El Clasico: കാത്തിരുന്ന എല് ക്ലാസികോ ഇന്ന്; ഫുട്ബോള് ലോകം ആവേശത്തില്
കാറ്റലോണിയന് പ്രക്ഷോഭങ്ങളുടെ പശ്ചാത്തലത്തില് മാറ്റിവെച്ച മത്സരമാണ് ഇന്ന് വീണ്ടും ബാഴ്സയുടെ തട്ടകത്തിൽ നടക്കുന്നത്. എന്നാൽ ഇന്നും പ്രതിഷേധങ്ങള്ക്കിടെ തന്നെയാണ് മത്സരം നടക്കുന്നത്
Samayam Malayalam 18 Dec 2019, 7:56 pm
സീസണിലെ ആദ്യത്തെ എല് ക്ലാസികോ പോരാട്ടം ഇന്ന് നടക്കും. ലീഗില് തുല്ല്യശക്തികളായി തുടരുന്ന ബാഴ്സലോണയും റയല് മാഡ്രിയും പോയിന്റ് പട്ടികയില് ഒന്നാം സ്ഥാനം ലക്ഷ്യമിട്ടാണ് ഇന്ന് പോരിനിറങ്ങുന്നത്. കാറ്റലോണിയന് പ്രക്ഷോഭങ്ങളുടെ പശ്ചാത്തലത്തില് നേരത്തേ മാറ്റിവെച്ച മത്സരമാണ് ഇന്ന് വീണ്ടും നടക്കുന്നത്. അതേസമയം ഇന്നും പ്രതിഷേധങ്ങള്ക്കിടെ തന്നെയാണ് മത്സരം സംഘടിപ്പിച്ചിരിക്കുന്നത്.
ലാലിഗയില് നിലവില് 35 വീതം പോയിന്റുമായി ബാഴ്സലോണയും റയല് മാഡ്രിഡും യഥാക്രമം ഒന്നും രണ്ടും സ്ഥാനങ്ങളിലാണ് ഉള്ളത്. 16 മത്സരങ്ങള് പൂര്ത്തിയാക്കിയപ്പോള് 11 ജയവും രണ്ട് സമനിലയും മൂന്ന് പരാജയവുമാണ് ബാഴ്സലോണയുടെ സമ്പാദ്യം. സീസണില് ഇതുവരെ 43 ഗോളുകള് നേടിയിട്ടുള്ള ടീം 20 ഗോളുകള് വഴങ്ങിയിട്ടുമുണ്ട്. അവസാന അഞ്ച് മത്സരങ്ങളില് നാല് ജയവും ഒരു സമനിലയും സ്വന്തമാക്കി.
അതേസമയം സീസണില് ഇതുവരെ 16 മത്സരങ്ങളില് നിന്നും 10 ജയങ്ങളാണ് റയല് മാഡ്രിഡിന് നേടാനായത്. അഞ്ച് മത്സരങ്ങള് സമനിലയിലായപ്പോള് ഒരേയൊരു മത്സരത്തില് മാത്രം പരാജയപ്പെട്ടു. 33 ഗോളുകള് എതിരാളികള്ക്ക് സമ്മാനിച്ച റയല് 12 ഗോളുകള് മാത്രമേ വഴങ്ങിയിട്ടുള്ളൂ. നിലവില് ഗോള് ശരാശരിയുടെ അടിസ്ഥാനത്തില് മാത്രമാണ് ബാഴ്സലോണ ഒന്നാം സ്ഥാനത്തും റയല് രണ്ടാം സ്ഥാനത്തും തുടരുന്നത്.
Also Read: ഫാറ്റിയെ മരണം വിളിച്ചത് കളിക്കുന്നതിനിടെ!! ഈ വര്ഷം ലോകത്തെ നടുക്കിയ 5 ഫുട്ബോള് മരണങ്ങള്
ഇന്ന് ബാഴ്സലോണയെ തറപറ്റിച്ച് ലീഗില് ഒന്നാം സ്ഥാനം കൈക്കലാക്കുക എന്ന ലക്ഷ്യത്തോടെയാണ് സിനദിന് സിദാന്റെ ടീം കാമ്പ് നൗവിലെത്തുക. അവസാന പതിനൊന്ന് മത്സരങ്ങളില് അപരാജിത മുന്നേറ്റമാണ് റയല് മാഡ്രിഡ് നടത്തിയിട്ടുള്ളത്. ബാഴ്സയ്ക്ക് എതിരെ ഈഡന് ഹസാര്ഡ് കളിക്കുന്നില്ല എങ്കിലും ഇന്നത്തെ മത്സരത്തില് ജയിക്കുന്നതിനാവശ്യമായ ടീമിനെ തന്നെ ഇറക്കാന് സിദാന് കഴിയും. അതിനൊത്ത ടീമുമായി തന്നെയാണ് കറ്റാലന് പടയെ നേരിടാന് സിദാന് തിരിച്ചിരിക്കുന്നത്.
ബോഴ്സലോണയിലും പരിക്കിന്റെ പിടിയിലായ മധ്യനിര താരം ആര്തറും ഡെംബലെയും ഇന്ന് കളിക്കുന്നില്ല എന്നത് പരിശീലകന് വാല്വെര്ദെയ്ക്ക് അല്പം തലവേദന സൃഷ്ടിക്കുന്നുണ്ട്. ഡിയോങ്ങിനൊപ്പം മധ്യനിരയില് ആരെ കളിപ്പിക്കുമെന്നത് പ്രശ്നം തന്നെയാണ്. എന്നാല് മുന്നേറ്റത്തില് മെസിയിലൂന്നിയുള്ള കളി തന്നെയാകും വാല്വെര്ഡെ പ്ലാന് ചെയ്യുക. ഇന്ന് അര്ധരാത്രി 12.30ന് ബാഴ്സയുടെ ഹോം ഗ്രൗണ്ടായ കാമ്പ് നൗവിലാണ് മത്സരം നടക്കുക.