റയലിൻെറ പരിശീലകസ്ഥാനം ഒഴിഞ്ഞ് സിദാൻ; ആരാവും ഇനി പിൻഗാമി?!

ലാലിഗയിലെ മോശം സീസണിനൊടുവിൽ റയൽ മാഡ്രിഡിനോട് വിടപറഞ്ഞ് സിനദെയ്ൻ സിദാൻ. സ്പാനിഷ് ക്ലബ്ബിനെ മികച്ച നേട്ടങ്ങളിലേക്ക് നയിച്ച സിദാന് ഈ സീസൺ നിരാശപ്പെടുത്തുന്നതായിരുന്നു. അത്ലറ്റികോ മാഡ്രിഡിന് പിന്നിൽ ലാലിഗയിൽ റയൽ രണ്ടാം സ്ഥാനത്തായി. ചാമ്പ്യൻസ് ലീഗ് സെമിഫൈനലിൽ ചെൽസിയോട് പരാജയപ്പെടുകയും ചെയ്തു.

ഇത് രണ്ടാം തവണയാണ് സിദാൻ റയലിൻെറ പരിശീലക സ്ഥാനത്ത് നിന്ന് രാജിവെക്കുന്നത്. 2016 മുതൽ ടീമിനെ പരിശീലപ്പിച്ച ഫ്രഞ്ച് ഇതിഹാസം മൂന്ന് തവണ ടീമിനെ ചാമ്പ്യൻസ് ലീഗ് ജേതാക്കളാക്കിയിട്ടുണ്ട്. രണ്ട് തവണ ലാലിഗയിലും റയൽ കിരീടം ചൂടി. ഏറെ ബഹുമാനത്തോടെയാണ് സിദാന് യാത്രയയപ്പ് നൽകുന്നതെന്ന് ക്ലബ്ബ് പുറത്തിറക്കിയ വാർത്താക്കുറിപ്പിൽ വ്യക്തമാക്കി.

സിദാന്‍ ഇറ്റാലിയന്‍ ക്ലബ്ബിലേക്ക്, റയലിന്റെ പുതിയ പരിശീലകന്‍ ഇവരില്‍ ഒരാള്‍!
സിദാൻെറ പിൻഗാമി ആരാവുമെന്ന കാര്യത്തിൽ ചർച്ചകൾ പുരോഗമിക്കുകയാണ്. മസിമിലാനോ അലെഗ്രിക്ക് സാധ്യതകളുണ്ടായിരുന്നു. എന്നാൽ നിലവിൽ അലെഗ്രി യുവൻറസ് പരിശീലകനാവാനുള്ള തയ്യാറെടുപ്പിലാണെന്നാണ് റിപ്പോർട്ടുകൾ. സീരി എയിൽ ഇൻറർ മിലാനെ ജേതാക്കളാക്കിയ അൻേറോണിയോ കോൻെറ റയലിൻെറ പരിശീലകനായി വരുമെന്നും റിപ്പോർട്ടുകളുണ്ട്. റയലിൻെറ ഇതിഹാസമെന്ന് വിശേഷിപ്പിക്കപ്പെടുന്ന മുൻ സ്പാനിഷ് നായകൻ റൗൾ ഗോൺസാൽവസിൻെറ പേരും പരിശീലക സ്ഥാനത്തേക്ക് പറഞ്ഞ് കേൾക്കുന്നുണ്ട്.