"അര്‍ജന്‍റീനയെ ഇഷ്ടമല്ല!! തന്‍റെ മകന്‍ അര്‍ജന്‍റീന ക്ലബ്ബിനായി കളിച്ചേക്കില്ല"- വെളിപ്പെടുത്തലുമായി മെസി

മാഡ്രിഡ്: തന്‍റെ മകന്‍ തിയാഗോയെ സംബന്ധിച്ച ചില പ്രത്യേക കാര്യങ്ങള്‍ വെളിപ്പെടുത്തി അര്‍ജന്‍റീനയുടെ സൂപ്പര്‍ താരം ലയണല്‍ മെസി. തിയാഗോയുടെ ഇഷ്ടങ്ങളും അനിഷ്ടങ്ങളും തുറന്ന് പറഞ്ഞാണ് മെസി രംഗത്തെത്തിയത്. ഇതോടൊപ്പം താൻ സ്പെയിൻ വിട്ട് പോകാതിരിക്കാനുള്ള കാരണവും മെസ്സി വെളിപ്പെടുത്തി.

Also Read: അടുത്ത കോപ്പ അമേരിക്ക കപ്പുയര്‍ത്തുമെന്ന് മെസി; താരത്തിന്‍റെ ആത്മവിശ്വാസത്തിന് കാരണമിതാണ്

തനിക്ക് തന്‍റെ കുടുംബമാണ് ഏറ്റവും പ്രിയപ്പെട്ടതെന്ന് താരം വ്യക്തമാക്കി. അവരെ ഏതെങ്കിലും തരത്തില്‍ വേദനിപ്പിക്കുന്ന യാതൊരു തീരുമാനങ്ങളും താൻ എടുക്കില്ല എന്നും മെസ്സി കൂട്ടിച്ചേര്‍ത്തു. അർജന്റീന ക്ലബായ ന്യൂവെൽസിൽ കളിക്കണമെന്ന് തനിക്ക് അതിയായ ആഗ്രഹമുണ്ട്. അക്കാര്യം താൻ സ്വപ്നം കാണാറുമുണ്ട്. എന്നാല്‍ അത് ഒരിക്കലും നടക്കാൻ സാധ്യതയില്ല എന്ന് മെസ്സി പറഞ്ഞു.

തന്‍റെ ആഗ്രഹങ്ങളേക്കാള്‍ തന്‍റെ കുടുംബത്തിന്‍റെ ആഗ്രഹമാണ് തനിക്ക് പ്രധാനം. മകൻ തിയാഗോയ്ക്ക് അർജന്റീന ഇഷ്ടമല്ലെന്ന കാര്യം മെസി തുറന്നു പറഞ്ഞു. അർജന്റീനയുമായി ബന്ധപ്പെട്ട ഒന്നും തിയാഗോയ്ക്ക് ഇഷ്ടമല്ല. താൻ എവിടെയെങ്കിലും പോവുകയാണ് എന്ന് പറയുമ്പോൾ തന്നെ അവന് വിഷമം വരും. സ്പെയിനില്‍ തന്നെ കഴിയാനാണ് തിയാഗോയ്ക്ക് ഇഷ്ടമെന്നും മെസി വ്യക്തമാക്കി.

Also Read: കിലിയന്‍ എംബാപ്പെ റയല്‍ മാഡ്രിഡിലേക്ക്? ബെയ്‍ലിനേയും റോഡ്രിഗസിനേയും റയല്‍ ഒഴിവാക്കുന്നു!!

കുടുബത്തോടൊപ്പം താൻ എപ്പോൾ അർജന്റീനയിലേക്ക് പോയാലും ഒരുമാസം പോലും തികച്ച് അവിടെ നിൽക്കാൻ സാധിക്കാറില്ല. തിയാഗോ എപ്പോഴും ബാഴ്സലോണയിൽ എത്തി അവന്‍റെ സുഹൃത്തുക്കളുടെ ഒപ്പം നിൽക്കാൻ ആഗ്രഹം പ്രകടിപ്പിച്ചു കൊണ്ടേയിരിക്കും. ആ ആവശ്യത്തെ തള്ളിക്കളയാന്‍ തനിക്ക് കഴിയില്ലെന്നും മെസ്സി പറഞ്ഞു. അതുകൊണ്ട് തന്നെ തനിക്ക് ബാഴ്സലോണ വിടാൻ ആഗ്രഹമില്ല എന്നും മെസ്സി കൂട്ടിച്ചേര്‍ത്തു.