പ്രീമിയര്‍ ലീഗ്: സ്വന്തം തട്ടകത്തില്‍ ആദ്യ ജയം സ്വന്തമാക്കി ചെല്‍സി

ഒടുവില്‍ ചെല്‍സി ആരാധകരുടെ ആ കാത്തിരിപ്പ് അവസാനിച്ചു. പ്രീമിയർ ലീഗിൽ ഈ സീസണിലെ ആദ്യ ഹോം ജയം സ്വന്തമാക്കി ചെൽസി. ബ്രയ്റ്റനെ എതിരില്ലാത്ത രണ്ട് ഗോളുകൾക്ക് തകര്‍ത്താണ് സ്വന്തം തട്ടകമായ സ്റ്റാംഫോഡ് ബ്രിഡ്ജിൽ ചെല്‍സി ജയം സ്വന്തമാക്കിയത്.

ഈ സീസണിലെ ആദ്യ ക്ളീൻ ഷീറ്റ് എന്ന ക്ലബ്ബിന്‍റെ കാത്തിരിപ്പിനും ഇന്നത്തെ മത്സരത്തോടെ അവസാനമായി. ജയത്തോടെ 7 മത്സരങ്ങളിൽ നിന്ന് 11 പോയിന്‍റുമായി ചെൽസി ആറാം സ്ഥാനത്തേക്ക് കുതിച്ചു. അതേസമയം ഏഴ് മത്സരങ്ങളില്‍ നിന്ന് ആറ് പോയിന്‍റ് മാത്രം സ്വന്തമായുള്ള ബ്രയ്റ്റൻ പതിനാറാം സ്ഥാനത്താണ്.

Also Read: മെട്രിക്സ് ചലഞ്ച് ഏറ്റെടുത്ത് ഇബ്രാഹിമോവിച്ചിന്‍റെ അതിശയിപ്പിക്കും വീഡിയോ

ആദ്യ പകുതിയിൽ ചെൽസി നിരവധി അവസരങ്ങൾ സൃഷ്ടിച്ചെങ്കിലും ലക്ഷ്യത്തിലെത്തിക്കുന്നതില്‍ വരുത്തിയ പിഴവുകൾ വിനയായി. ഫിനിഷിങ്ങിലെ പോരായ്മ ചെല്‍സിക്ക് അർഹമായ ലീഡ് ലഭിക്കുന്നതിന് തടസ്സമായത്. ബാർക്ലി, പെഡ്രോ, ആലോൻസോ എന്നുവരാണ് മികച്ച അവസരങ്ങൾ തുലച്ച് കളഞ്ഞത്. എന്നാല്‍ ബ്രയ്റ്റന് ചില ചെറിയ അവസരങ്ങൾ മാത്രമാണ് ലഭിച്ചത്.


ആദ്യ പകുതിയിലെ പോരായ്മകള്‍ തിരുത്തി രണ്ടാം പകുതിയുടെ തുടക്കത്തിൽ തന്നെ ചെൽസി ലീഡ് നേടി. 50 ആം മിനുട്ടിൽ മൗണ്ടിനെ ബോക്‌സിൽ ഫൗള്‍ ചെയ്ത് വീഴ്ത്തിയതിന് ലഭിച്ച പെനാൽറ്റി ജോർജിഞ്ഞോ ഗോളാക്കി മാറ്റുകയായിരുന്നു. ഇതോടെ 1-0ത്തിന് ചെൽസി മുന്നിൽ എത്തി.

Also Read: 'ഡബിള്‍ സെഞ്ച്വറിക്ക് 200 റണ്‍സ് കുറവ്'; രോഹിതിനെ ട്രോളി സോഷ്യന്‍ മീഡിയ

മത്സരം ഒരു മണിക്കൂർ പിന്നിട്ടതോടെ കോച്ച് ലംപാർഡ് പെഡ്രോയെ തിരിച്ചുവിളിച്ച് ഓഡോയിയെ കളത്തിലിറക്കിയതോടെ ചെൽസിയുടെ ആക്രമണത്തിന് മൂർച്ച കൂടി. അധികെ വൈകാതെ ഓഡോയിയുടെ അസിസ്റ്റില്‍ വില്ലിയൻ ചെൽസിയുടെ ലീഡ് രണ്ടാക്കി ഉയർത്തി. 76 ആം മിനുട്ടിലായിരുന്നു വില്ലിയന്‍റെ ഗോള്‍.