"രണ്ട് വര്‍ഷത്തേക്ക് മാഞ്ചസ്റ്റര്‍ യുണൈറ്റഡ് ഒരു കിരീടത്തെ കുറിച്ചും ചിന്തിക്കേണ്ട"

സതാംപ്ടണ്‍: ഇംഗ്ലീഷ് പ്രീമിയര്‍ ലീഗിന്‍റെ പുതിയ സീസണിലെ മോശം പ്രകടനത്തിന് പിന്നാലെ മാഞ്ചസ്റ്റർ യുണൈറ്റഡിനെതിരെ വിമര്‍ശനവുമായി ക്ലബ്ബിന്‍റെ എക്കാലത്തെയും ഇതിഹാസ താരം പോൾ സ്കോൾസ് രംഗത്ത്. ടീമിന്‍റെ നിലവിലെ പ്രകടനം പരിതാപകരമാണെന്നും മാഞ്ചസ്റ്റർ യുണൈറ്റഡ് ഒരു മികച്ച ക്ലബായി മാറാൻ ഇനിയും വർഷങ്ങൾ എടുക്കുമെന്നും പോൾ സ്കോൾസ് പറഞ്ഞു. അടുത്ത രണ്ട് വര്‍ഷക്കാലത്തേക്ക് ഒരു കിരീടത്തെ കുറിച്ചും മാഞ്ചസ്റ്റര്‍ യുണൈറ്റഡ് ചിന്തിക്കേണ്ടതില്ലെന്നും അദ്ദേഹം കൂട്ടിച്ചേര്‍ത്തു.

Also Read: ഫൗളിന് പിന്നാലെ ഡേവിഡ് ലൂയിസ് സലായുടെ കാതില്‍ പറഞ്ഞതെന്ത്?

പ്രീമിയർ ലീഗിൽ ഈ സീസണിൽ കളിച്ച നാലു മത്സരങ്ങളിൽ മൂന്നെണ്ണത്തിലും മാഞ്ചസ്റ്റർ യുണൈറ്റഡിന് വിജയിക്കാൻ കഴിഞ്ഞിരുന്നില്ല. ഒരു മത്സരത്തില്‍ പരാജയപ്പെടുകയും രണ്ട് മത്സരങ്ങള്‍ സമനിലയില്‍ കലാശിക്കുകയും ചെയ്തപ്പോള്‍ ഏക മത്സരത്തില്‍ മാത്രമാണ് ക്ലബ്ബിന് ജയിക്കാനായത്. ഇതുവരെയുള്ള നാല് മത്സരങ്ങളില്‍ ഏഴ് ഗോളുകളാണ് ടീം എതിരാളികളുടെ വലയില്‍ നിക്ഷേപിച്ചിരിക്കുന്നത്. എന്നാല്‍ നാല് ഗോളുകള്‍ വഴങ്ങുകയും ചെയ്തിട്ടുണ്ട്. പട്ടികയില്‍ അഞ്ച് പോയിന്‍റുമായി എട്ടാം സ്ഥാനത്താണ് ഇപ്പോള്‍ മാഞ്ചസ്റ്റര്‍ യുണൈറ്റഡ് ഉള്ളത്.

Also Read: ആടിന് ഫ്രഞ്ചില്‍ പറയുന്ന പേരെന്ത്? 15കാരന്‍റെ അമ്പരപ്പിക്കുന്ന ഉത്തരങ്ങൾ വൈറലാകുന്നു

മാഞ്ചസ്റ്റർ യുണൈറ്റഡിൽ നിരവധി മാറ്റങ്ങളാണ് നടക്കുന്നത്. പരിശീലകന്‍ ഒലെ ടീമിന് ആവശ്യമില്ലാത്ത താരങ്ങളെ എല്ലാം പുറത്താക്കുന്നുണ്ട്‌. പക്ഷെ ഇവര്‍ക്ക് പകരക്കാരെ ടീമില്‍ എത്തിക്കാൻ സമയം എടുക്കുമെന്ന് സ്കോൾസ് ചൂണ്ടിക്കാട്ടി. അടുത്ത രണ്ട് വർഷത്തേക്ക് ഒരു കിരീടത്തെ കുറിച്ചും മാഞ്ചസ്റ്റർ യുണൈറ്റഡ് ചിന്തിക്കേണ്ടതില്ല‌. അഞ്ചോ ആറോ ട്രാൻസ്ഫർ വിൻഡോകൾ ഒലെയ്ക്ക് ലഭിച്ചാൽ മാത്രമെ യുണൈറ്റഡിന് നല്ല ടീമിനെ വാര്‍ത്തെടുക്കാൻ കഴിയുകയുള്ളൂ എന്ന് സ്കോൾസ് പറഞ്ഞു‌. അതുവരെ മാഞ്ചസ്റ്റർ സിറ്റി, ലിവർപൂൾ, ടോട്ടൻഹാം, ചെൽസി എന്നീ ടീമുകൾക്ക് പിറകിൽ നിൽക്കാനെ മാഞ്ചസ്റ്റർ യുണൈറ്റഡിന് കഴിയൂവെന്നും അദ്ദേഹം കൂട്ടിച്ചേര്‍ത്തു.