പ്രീമിയര് ലീഗിലെ ഏറ്റവും മോശം പ്രകടനത്തിന് പിന്നാലെ മാഞ്ചസ്റ്റര് യുണൈറ്റഡിനെ ആരാധകര് കയ്യൊഴിയുന്നു. ക്ലബ്ബ് ഉടമകളായ ഗ്ലേസേഴ്സിനെതിരെ പ്രതിഷേധം കടുപ്പിക്കാനാണ് ആരാധകര് തീരുമാനിച്ചിരിക്കുന്നത്. കഴിഞ്ഞ മത്സരത്തില് കളി തീരുന്നതിന് മുമ്പ് തന്നെ പ്രതിഷേധ സൂചകമായി ആരാധകര് കൂട്ടത്തോടെ സ്റ്റേഡിയം വിട്ടിരുന്നു. ഇത് തുടരാനാണ് തീരുമാനം.
പുതിയ താരങ്ങളെ എത്തിച്ച് മാഞ്ചസ്റ്റർ യുണൈറ്റഡിനെ രക്ഷപ്പെടുത്താന് ക്ലബ് ഉടമകൾ തയ്യാറാകാത്ത സാഹചര്യത്തിലാണ് പ്രതിഷേധങ്ങൾ കടുപ്പിക്കാനുള്ള ആരാധകരുടെ തീരുമാനം. ഇതിന്റെ ഭാഗമായാണ് ഗ്യാലറിയിൽ നിന്ന് ഇറങ്ങിപ്പോയി കൊണ്ട് പ്രതിഷേധിക്കാൻ യുണൈറ്റഡ് ആരാധകർ തീരുമാനിച്ചിരിക്കുന്നത്. ഫെബ്രുവരി തുടക്കത്തിൽ വോൾവ്സിനെതിരെ നടക്കുന്ന ഹോം മത്സരത്തിൽ മാഞ്ചസ്റ്റർ യുണൈറ്റഡ് ആരാധകർ ഇത്തരത്തിൽ പ്രതിഷേധിക്കും.
Also Read: ബ്ലാസ്റ്റേഴ്സ് ആദ്യനാലിലെത്തുമോ? ബുദ്ധിമുട്ടെന്ന് തുറന്നടിച്ച് ക്യാപ്റ്റൻ ഒഗ്ബെചെ
മത്സരത്തിനായി ടിക്കറ്റ് എടുത്ത് ഗ്യാലറിയില് കയറിയ ശേഷം കളിയുടെ 58ാം മിനുട്ടിൽ മുഴുവൻ ആരാധകരും സ്റ്റേഡിയം വിടുന്ന രീതിയിലാണ് പ്രതിഷേധം പ്ലാന് ചെയ്തിരിക്കുന്നത്. ക്ലബിന്റെ ഈ ദുരവസ്ഥയ്ക്ക് കാരണം ക്ലബ് ഉടമകൾ തന്നെയാണ് എന്നതാണ് ആരാധകരുടെ ആരോപണം. ഇത് തന്നെയാണ് ആരാധകരെ രോഷാകുലരാക്കുന്നത്. അമേരിക്കൻ വ്യവസായികളായ ഗ്ലേസേഴ്സ് കുടുംബത്തിന്റെ ഉടമസ്ഥതയിലാണ് മാഞ്ചസ്റ്റർ യുണൈറ്റഡ് ഉള്ളത്.