1. ലിവര്‍പൂള്‍
ഇംഗ്ലീഷ് പ്രീമിയര്‍ ലീഗ് അതിന്‍റെ അവസാന ഘട്ടത്തിലേക്ക് കടക്കുന്ന സമയത്താണ് കൊറോണ വൈറസ് വ്യാപകമായി പടര്‍ന്നു പിടിച്ചതും മത്സരങ്ങളെല്ലാം മാറ്റിവെക്കേണ്ടി വന്നതും. ലീഗില്‍ ഇനിയും മത്സരങ്ങള്‍ ബാക്കിയുണ്ടെങ്കില്‍ പോലും പോയിന്‍റ് പട്ടികയില്‍ രണ്ടാം സ്ഥാനത്ത് നില്‍ക്കുന്ന മാഞ്ചസ്റ്റര്‍ സിറ്റിയേക്കാള്‍ 25 പോയിന്‍റ് വ്യത്യാസത്തിലാണ് കരുത്തരായ ലിവര്‍പൂള്‍ ഒന്നാം സ്ഥാനം അലങ്കരിക്കുന്നത്. രണ്ടാം സ്ഥാനക്കാരെ അതിദൂരം പിന്നിലാക്കിയാണ് ലിവര്‍പൂള്‍ കിരീടത്തിലേക്ക് കുതിക്കുന്നത് എന്ന് സാരം. കൊറോണ വൈറസ് ബാധയ്ക്ക് പിന്നാലെ ഇനി ലീഗ് ഉപേക്ഷിക്കുന്നുവെങ്കില്‍ തന്നെ 30 വര്‍ഷത്തിന് ശേഷം ആദ്യമായി പ്രീമിയര്‍ ലീഗ് കിരീടം നേടാന്‍ ലിവര്‍പൂളിന് കഴിഞ്ഞേക്കും എന്നാണ് ഊഹാപോഹങ്ങള്‍. സീസണ്‍ പുനരാരംഭിക്കുകയാണെങ്കില്‍ ഏറ്റവും ഒടുവില്‍ വഴങ്ങിയ തോല്‍വികളില്‍ നിന്ന് കരകയറുന്നതിനായി പുതിയ ഊര്‍ജം സംഭരിക്കാനുള്ള ഇടവേളയായും ഇത് മാറും.
Twitter-Liverpool FC
2. ടോട്ടനം ഹോട്സ്പര്‍
പ്രീമിയര്‍ ലീഗില്‍ ഉള്‍പ്പെടെ വലിയ പരാജയങ്ങള്‍ ഏറ്റുവാങ്ങേണ്ടി വന്ന ടീമാണ് ഹോസെ മൗറീഞ്ഞ്യോയുടെ ടോട്ടനം ഹോട്സ്പര്‍. നോര്‍വിച്ച് സിറ്റിയോട് തോറ്റ് എഫ്എ കപ്പില്‍ നിന്ന് പുറത്തായ ടോട്ടനം ഹോട്സ്പര്‍ ആര്‍ബി ലീപ്സിഗിനോട് തോറ്റ് ചാമ്പ്യന്‍സ് ലീഗില്‍ നിന്നും പുറത്തേക്ക് പോകേണ്ടിവന്നു. പ്രീമിയര്‍ ലീഗില്‍ ചെല്‍സിയോടും വോള്‍വ്സിനോടും തോറ്റ ടീം പിന്നാലെ ബേണ്‍ലിയോട് സമനില വഴങ്ങുകയും ചെയ്തു. എന്നാല്‍ അറ്റാക്കിങ് നിരയിലെ താരങ്ങള്‍ക്കെല്ലാം പരിക്കേറ്റ് പുറത്തിരിക്കേണ്ടി വന്നതാണ് ടോട്ടനത്തിന്‍റെ ഈ ദുരവസ്ഥയ്ക്ക് കാരണം. ഹാരി കെയ്നിന് ഒപ്പം തന്നെ മൗസ സിസോകോ, സ്റ്റീവന്‍ ബെര്‍ഗ്വിന്‍ അടക്കമുള്ള താരങ്ങളെല്ലാം പരിക്കിന്‍റെ പിടിയിലാണ്. എന്നാല്‍ കൊറോണ മൂലമുള്ള ഈ ഒഴിവുദിനങ്ങള്‍ താരങ്ങള്‍ക്ക് പരിക്ക് മാറി തിരിച്ചെത്താനുള്ള അവസരമായി മാറുകയാണ് ടോട്ടനത്തിന്.
Twitter-Tottenham Hotspur
3. ആസ്റ്റണ്‍ വില്ല
കൊറോണ വൈറസ് വ്യാപനത്തിന് പിന്നാലെ പ്രീമിയര്‍ ലീഗ് മത്സരങ്ങള്‍ ഉപേക്ഷിക്കുന്നതിന് തൊട്ട് മുമ്പ് വരെ വലിയ പ്രതിസന്ധിയിലായിരുന്നു ആസ്റ്റണ്‍ വില്ല. ലിസസ്റ്റര്‍ സിറ്റിക്കെതിരായ 4-0ത്തിന്‍റെ വമ്പന്‍ പരാജയം പോയിന്‍റ് പട്ടികയില്‍ അവരെ 19ാം സ്ഥാനത്തേക്കാണ് പിന്തള്ളിക്കളഞ്ഞത്. ഈ സാഹചര്യം തുടര്‍ന്നാല്‍ ആസ്റ്റണ്‍ വില്ലയുടെ പരിശീലകന്‍റെ ജോലി ഉള്‍പ്പെടെ തെറിക്കുന്ന സാഹചര്യമാണുള്ളത്. പ്രമുഖ താരങ്ങളുടെ പരിക്ക് തന്നെയാണ് ആസ്റ്റണ്‍ വില്ലയ്ക്കും തിരിച്ചടിയാകുന്നത്. എന്നാല്‍ നിലവിലെ കോറോണ ഇടവേള ഏറെ ഗുണം ചെയ്യുന്ന മറ്റൊരു ടീമാണ് ആസ്റ്റണ്‍ വില്ല. പരിക്കേറ്റ് പുറത്തിരിക്കുന്ന ജോണ്‍ മക്ഗിന്‍, ടോം ഹീറ്റണ്‍ തുടങ്ങിയ താരങ്ങള്‍ക്കെല്ലാം ഈ ഇടവേള കഴിഞ്ഞ് കൂടുതല്‍ കരുത്തോടെ തിരിച്ചെത്താനാകും.
Twitter-Mirror Football
കിരീടം ലിവര്‍പൂള്‍ നേടുമോ?
ഇക്കുറി ഇംഗ്ലീഷ് പ്രീമിയര്‍ ലീഗ് ഉപേക്ഷിച്ചില്ലെങ്കില്‍ തീര്‍ച്ചയായും കിരീടം ലിവര്‍പൂളിന് തന്നെയായിരിക്കും എന്ന കാര്യത്തില്‍ തര്‍ക്കമില്ല. ഇനിയിപ്പോള്‍ കൊറോണ ഭീഷണിയെ തുടര്‍ന്ന് ലീഗ് മാറ്റിവെച്ചാലും കിരീടം ലിവര്‍പൂളിന് നല്‍കണമെന്നതാണ് ഉയര്‍ന്ന് വരുന്ന വാദം. 29 മത്സരങ്ങലില്‍ നിന്ന് 82 പോയിന്‍റുമായാണ് നിലവില്‍ ലിവര്‍പൂള്‍ ഇപിഎല്‍ പട്ടികയില്‍ ഒന്നാം സ്ഥാനത്ത് തുടരുന്നത്. രണ്ടാം സ്ഥാനത്ത് ഉള്ള മാഞ്ചസ്റ്റര്‍ സിറ്റിക്ക് 28 മത്സരങ്ങളില്‍ നിന്ന് 57 പോയിന്‍റ് മാത്രമേയുള്ളൂ. 25 പോയിന്‍റ് വ്യത്യാസമുണ്ട് രണ്ട് ടീമുകളും തമ്മില്‍. എന്നാല്‍ ലീഗ് പൂര്‍ത്തിയാക്കാന്‍ കഴിഞ്ഞില്ലെങ്കില്‍ കിരീടം ലിവര്‍പൂളിന് നല്‍കരുതെന്ന വാദവും മറുവശത്ത് ഉയരുന്നുണ്ട്.