റൊണാൾഡോ-ഡിബാല സഖ്യം കസറി; സ്പാലിനെതിരെ യുവന്‍റസിന് ജയം

സീരി എയിൽ അഞ്ചാം ജയം സ്വന്തമാക്കി യുവന്‍റസ്. റൊണാൾഡോ ആദ്യ ഇലവനിൽ തിരികെ എത്തിയ മത്സരത്തിൽ മിന്നുന്ന ‍ജയമാണ് ക്ലബ്ബ് സ്വന്തമാക്കിയത്. സീരി എ ലീഗിൽ സ്പാലിനെ ആണ് ഇറ്റാലിയൻ ചാമ്പ്യന്മാർ എതിരില്ലാത്ത രണ്ട് ഗോളുകള്‍ക്ക് പരാജയപ്പെടുത്തിയത്.

തികച്ചും ഏകപക്ഷീയമായിരുന്നു യുവന്‍റസും സ്പാലും തമ്മിലുള്ള മത്സരം. റൊണാള്‍ഡോയുടെ ഹെഡര്‍ ഗോളടക്കം മറുപടിയില്ലാത്ത രണ്ടു ഗോളുകളുടെ വിജയമാണ് യുവന്‍റസ് സ്വന്തമാക്കിയത്. ജയത്തോടെ ലീഗില്‍ 16 പോയിന്‍റുമായി ഒന്നാം സ്ഥാനത്തേക്ക് കുതിച്ചിരിക്കുകയാണ് യുവന്‍റസ്.

Also Read: മെട്രിക്സ് ചലഞ്ച് ഏറ്റെടുത്ത് ഇബ്രാഹിമോവിച്ചിന്‍റെ അതിശയിപ്പിക്കും വീഡിയോ

ആദ്യ ഇലവനില്‍ തന്നെ കളത്തിലിറങ്ങിയ റൊണാള്‍ഡോ മികച്ച പ്രകടനമാണ് യുവന്‍റസിനായി പുറത്തെടുത്തത്. ഡിബാല- റൊണാൾഡോ സഖ്യത്തിന്‍റെ ഗംഭീര പ്രകടനവും ഇന്നത്തെ മത്സരത്തില്‍ കാണാൻ കഴിഞ്ഞു. റൊണാൾഡോയ്ക്ക് ഒപ്പം ഡിബാലയെയും ആദ്യ ഇലവനിൽ ഇറക്കിയാണ് ഇന്ന് യുവന്റസ് ഇറങ്ങിയത്.


യുവന്‍റസിന്‍റെ കോച്ച് മൗറീഷ്യോ സാറിയുടെ തീരുമാനം 100 ശതമാനവും ശരിവെക്കുന്ന പ്രകടനമാണ് ഡിബാലയും റൊണാള്‍ഡോയും പുറത്തെടുത്തത്. ഇരുവരുടെയും കാലുകള്‍ തന്നെയാണ് ഇന്നത്തെ കളി നിയന്ത്രിച്ചതും. ആദ്യ ഗോള്‍ പ്യാമിച്ച് നേടിയപ്പോള്‍ മനോഹരമായൊരു ഹെഡറിലൂടെ രണ്ടാം ഗോള്‍ റൊണാള്‍ഡോയും സ്വന്തമാക്കി.

Also Read: 'ഡബിള്‍ സെഞ്ച്വറിക്ക് 200 റണ്‍സ് കുറവ്'; രോഹിതിനെ ട്രോളി സോഷ്യന്‍ മീഡിയ

മത്സരത്തിന്‍റെ ആദ്യ പകുതി അവസാനിക്കുന്നതിന് തൊട്ടു മുമ്പാണ് പ്യാമിച് ഒരു ഗംഭീര മുന്നേറ്റത്തിലൂടെ യുവന്റസിന് ലീഡ് നേടിക്കൊടുത്തത്. ആദ്യ പകുതി അവസാനിച്ചപ്പോള്‍ എതിരില്ലാത്ത ഒരു ഗോളിന് യുവന്‍റസ് മുന്നില്‍.

രണ്ടാം പകുതിയിൽ ഡിബാല എടുത്ത ഗംഭീര ക്രോസ് ഹെഡറിലൂടെ വലയിൽ എത്തിച്ച് റൊണാൾഡോ യുവന്‍റസിന്‍റെ ലീഡുയര്‍ത്തി. 78ാം മിനുട്ടിലായിരുന്നു വിജയം ഉറപ്പിച്ച റൊണാള്‍ഡോയുടെ ഹെഡര്‍ ഗോള്‍. റൊണാൾഡോയുടെ സീസണിലെ മൂന്നാമത്തെ ഗോളായിരുന്നു ഇത്. റൊണാൾഡോയ്ക്ക് നിരവധി മികച്ച അവസരങ്ങൾ ലഭിച്ചിരുന്നു എങ്കിലും സ്പാലിന്‍റെ ഗോൾകീപ്പര്‍ ഈ മുന്നേറ്റങ്ങളെയെല്ലാം നിഷ്പ്രഭമാക്കുകയായിരുന്നു.