Pro Kabaddi 2019: ബംഗാൾ വാരിയേഴ‍്‍സിനും പട‍്‍ന പൈററ്റ‍്‍സിനും വിജയം

കൊൽക്കത്ത: ഇഞ്ചോടിഞ്ച് പോരാട്ടത്തിനൊടുവിൽ ബെംഗലൂരു ബുൾസിനെ പരാജയപ്പെടുത്തി ബംഗാൾ വാരിയേഴ്സ്. മുന്നേറ്റനിര താരം മനീന്ദർ സിങ് തിളങ്ങിയ മത്സരത്തിൽ 42-40നാണ് ബംഗാളിൻെറ വിജയം. 17 റെയ്ഡ് പോയിൻറുകളാണ് മനീന്ദർ നേടിയത്. ബെംഗലൂരുവിന് വേണ്ടി പവൻ ഷെറാവത്ത് 19 റെയ‍്‍ഡ് പോയിൻറുകൾ നേടി.

പോയിൻറ് പട്ടികയിൽ രണ്ടാം സ്ഥാനത്താണ് ബംഗാൾ വാരിയേഴ്സ്. കൊൽക്കത്തയിൽ നടന്ന മൂന്ന് മത്സരങ്ങളിലും ടീം വിജയം നേടി. മികച്ച റെയ്ഡ‍‍ർമാർ തമ്മിലുള്ള പോരാട്ടമായാണ് ബംഗാളും ബെംഗലൂരുവും തമ്മിലുള്ള മത്സരം വിലയിരുത്തപ്പെട്ടിരുന്നത്. കളിക്കളത്തിലും ആ വീറും വാശിയും ഇരുടീമുകളും പുറത്തെടുക്കുകയും ചെയ്തു.


വ്യാഴാഴ്ച നടന്ന മറ്റൊരു മത്സരത്തിൽ ജെയ്പൂ‍ർ പിങ്ക് പാന്തേഴ്സിനെ ചെറിയ മാ‍ർജിനിൽ തോൽപ്പിച്ച് പട്ന പൈററ്റ്സ് പ്ലേ ഓഫ് സാധ്യതകൾ നിലനി‍ർത്തി. സൂപ്പ‍ർതാരം സന്ദീപ് നർവാൾ പൈററ്റ്സിനായി മികച്ച പ്രകടനമാണ് പുറത്തെടുത്തത്. 36-33നാണ് ടീം വിജയം നേടിയത്.

തുട‍ർച്ചയായ രണ്ടാം വിജയത്തോടെ പോയിൻറ് പട്ടികയിൽ അവസാന സ്ഥാനത്ത് നിന്ന് മൂന്ന് സ്ഥാനങ്ങൾ മുന്നോട്ട് കയറി പൈററ്റ്സ് 9ാം സ്ഥാനത്തെത്തി.