Pro Kabaddi Season 7: അടിമുടി മാറി പ്രോ കബഡി ലീഗ്, ഇത്തവണ പുതിയ പരിഷ്കാരങ്ങള്‍

ഹൈദരാബാദ്: ശനിയാഴ്ച ഹൈദരാബാദില്‍ ആരംഭിക്കുന്ന പ്രോ കബഡി ലീഗില്‍ ഇത്തവണ നിരവധി പരിഷ്കാരങ്ങള്‍. താരങ്ങള്‍ക്ക് ആശ്വാസം നല്‍കുന്ന നിരവധി മാറ്റങ്ങളുമായാണ് ഏഴാമത് പ്രോ കബഡി ലീഗ് നടക്കുക. കഴിഞ്ഞ ആറ് സീസണുകള്‍ക്കും വലിയ സ്വീകാര്യത ലഭിച്ചതോടെയാണ് ഏറെ പരിഷ്കാരങ്ങളോടെ ഏഴാമത് സീസണ്‍ ഒരുക്കാന്‍ സംഘാടകര്‍ തീരുമാനിച്ചത്.

കഴിഞ്ഞ സീസണുകളില്‍ ഗ്രൂപ്പടിസ്ഥാനത്തിലായിരുന്നു മത്സരങ്ങള്‍. ഇതില്‍ നിന്നും ടീമുകള്‍ സെമിയില്‍ എത്തുന്ന രീതിയായിരുന്നു ഉണ്ടായിരുന്നത്. എന്നാല്‍ ഐപിഎല്‍ മാതൃകയിലാണ് പ്രോ കബഡി ലീഗ് ഇത്തവണ പുനസംഘടിപ്പിച്ചിരിക്കുന്നത്. എല്ലാ ടീമുകളും തമ്മില്‍ പരസ്പരം രണ്ടു തവണ ഏറ്റുമുട്ടും. സീസണ്‍ പകുതിയാകുമ്പോഴേക്കും എല്ലാ ടീമുകള്‍ക്കും പകുതി മത്സരങ്ങള്‍ കഴിയുന്ന രീതിയിലാണ് ക്രമീകരണം.

മുന്‍വര്‍ഷങ്ങളില്‍ തുടരെത്തുടരെ മത്സരങ്ങള്‍ നടത്തേണ്ടി വന്നതും താരങ്ങള്‍ക്ക് ആവശ്യമായ വിശ്രമം ലഭിക്കാതെ വന്നതും ആക്ഷേപത്തിന് ഇടയാക്കിയിരുന്നു. എന്നാല്‍ ഇക്കാര്യത്തിലും പരിഹാരവുമായാണ് പുതുയ സീസണ്‍ ആരംഭിക്കുന്നത്. മത്സരങ്ങള്‍ തമ്മില്‍ ഇത്തവണ കൃത്യമായ ഇടവേളകള്‍ നല്‍കിയിട്ടുണ്ട്. ഇത്തരത്തില്‍ മത്സരങ്ങള്‍ക്കിടയില്‍ കൂടുതല്‍ ഇടവേള ലഭിക്കുന്നത് കളിക്കാര്‍ക്ക് നേട്ടമാകും. പരിക്കുകളും തുടര്‍മത്സരങ്ങളും കളിക്കാരുടെ ശാരീരിക്ഷമതയെ ബാധിക്കുന്നുവെന്ന പരാതി ഇതോടെ ഒഴിവാകും.

മുന്‍ സീസണുകളിലേത് പോലെ ഇത്തവണയും 12 ടീമുകളാണ് പ്രോ കബഡി ലീഗില്‍ ഇത്തവണയും പങ്കെടുക്കുന്നത്. ബെംഗളുരു ബുള്‍സ്, യു മുംബ, ഗുജറാത്ത് ഫോര്‍ച്യൂണ്‍ ജയന്റ്‌സ്, പറ്റ്‌ന പൈറേറ്റ്‌സ്, തെലുഗ് ടൈറ്റന്‍സ്, ബംഗാള്‍ വാറിയേഴ്‌സ്, യു.പി .യോദ്ധ, പുണേരി പള്‍ട്ടാന്‍, ജയ്പൂര്‍ പിങ്ക് പാന്ഥേഴ്‌സ്, ഹരിയാണ സ്റ്റീലേഴ്‌സ്, ദബാംഗ് ഡല്‍ഹി, തമിഴ് തലൈവാസ് എന്നിവരാണ് ഏഴാം സീസണില്‍ നേര്‍ക്കുനേര്‍ പോരാട്ടത്തിനൊരുങ്ങുന്ന ടീമുകള്‍. ഗ്രൂപ്പ് മത്സരങ്ങള്‍ക്ക് പിന്നാലെ പോയിന്‍റ് നിലിയില്‍ മു്നനിലെത്തുന്ന ആറ് ടീമുകകളാണ് പ്ലേ ഓഫില്‍ പ്രവേശിക്കുക. ഒക്ടോബര്‍ 14നാണ് പ്ലേഓഫ് മത്സരങ്ങള്‍ ആരംഭിക്കും. 19നാണ് കലാശപ്പോരാട്ടം നടക്കുക.

ശനിയാഴ്ച രാത്രി 7.30ന് ഹൈദരാബാദിലാണ് ഈ വര്‍ഷത്തെ പ്രോ കബഡി ടൂര്‍ണമെന്‍റിന് തുടക്കമാകുന്നത്. ഹൈദരാബാദില്‍ വെച്ച് നടക്കുന്ന ഉദ്ഘാടന മത്സരത്തില്‍ യു മുംബ തെലുഗ് ടൈറ്റാനെയാണ് നേരിടുന്നത്. മറ്റൊരു മത്സരത്തില്‍ ബെംഗളൂരു ബുള്‍സും പറ്റ്ന പൈറേറ്റ്സും തമ്മില്‍ ഏറ്റുമുട്ടും.