ഇന്ത്യൻ ക്രിക്കറ്റ് താരങ്ങളുമായി കോഹ‍്‍ലിയുടെ കബഡി ടീം; രോഹിത് ഇല്ല, ധോണി ടീമിൽ

ന്യൂഡൽഹി: ഇന്ത്യൻ ക്രിക്കറ്റ് താരങ്ങളെ ഉൾപ്പെടുത്തി കബഡി ടീം പ്രഖ്യാപിച്ചിരിക്കുകയാണ് നായകൻ വിരാട് കോഹ‍്‍ലി. പ്രോ കബഡി ലീഗ് ഏഴാം സീസൺ പ്രമോഷൻെറ ഭാഗമായാണ് കോഹ‍്‍ലി ഇന്ത്യൻ ക്രിക്കറ്റ് ടീം അംഗങ്ങളെ ഉൾപ്പെടുത്തി ഒരു ടീം പ്രഖ്യാപിച്ചത്. പ്രോ കബഡി ലീഗ് തങ്ങളുടെ ഒഫീഷ്യൽ ട്വിറ്ററിൽ കോഹ‍്‍ലിയുടെ വീഡിയോ ഷെയർ ചെയ്തിട്ടുണ്ട്.

തമിഴ് തലൈവാസിൻെറ സൂപ്പർതാരം രാഹുൽ ചൗധരിയാണ് തൻെറ പ്രിയപ്പെട്ട കബഡി താരമെന്നും ഇന്ത്യൻ നായകൻ വെളിപ്പെടുത്തി. ഇന്ത്യക്കായും തമിഴ് തലൈവാസിനായും കളിക്കുമ്പോൾ ചൗധരിയും അജയ് താക്കൂറും തമ്മിലുള്ള കോമ്പിനേഷൻ തനിക്ക് ഏറെ ഇഷ്ടമുള്ളതാണ്. ഇത് താനും എംഎസ് ധോണിയും തമ്മിലുള്ള ബന്ധം പോലെയാണെന്ന് തോന്നാറുണ്ടെന്നും കോഹ‍്‍ലി കൂട്ടിച്ചേർത്തു.

ഏഴ് കളിക്കാരെയാണ് ടീമിൽ വേണ്ടതെങ്കിലും ആറ് പേരെയേ കോഹ‍്‍ലി നിർദ്ദേശിച്ചുള്ളൂ. നല്ല കായികശേഷിയും കരുത്തും വേണ്ട മത്സരമാണ് കബഡിയെന്നും അതിന് പറ്റുന്നവരെ മാത്രമേ ടീമിൽ ഉൾപ്പെടുത്തുന്നുള്ളൂവെന്നും ഇന്ത്യൻ ക്രിക്കറ്റ് ടീം നായകൻ പറഞ്ഞു. അതിനാൽ തന്നെ സ്വയം ടീമിൽ നിന്ന് ഒഴിഞ്ഞ നിൽക്കുന്നതായും അദ്ദേഹം കൂട്ടിച്ചേർത്തു.

മഹേന്ദ്ര സിങ് ധോണി, രവീന്ദ്ര ജഡേജ, കെഎൽ രാഹുൽ, ഉമേഷ് യാദവ്, ജസ്പ്രീത് ബുംറ, ഋഷഭ് പന്ത് എന്നിവരെയാണ് കോഹ‍്‍ലി തൻെറ ടീമിൽ പ്രഖ്യാപിച്ചിരിക്കുന്നത്. ഇന്ത്യൻ ടീമിൻെറ ഉപനായകൻ രോഹിത് ശർമയും ഈ കബഡി ടീമിൽ ഇല്ല.


ഇത്തവണ നിരവധി മാറ്റങ്ങളുമായാണ് ഏഴാമത് പ്രോ കബഡി ലീഗ് നടക്കുന്നത്. കഴിഞ്ഞ സീസണുകളില്‍ ഗ്രൂപ്പടിസ്ഥാനത്തിലായിരുന്നു മത്സരങ്ങള്‍. ഇതില്‍ നിന്നും ടീമുകള്‍ സെമിയില്‍ എത്തുന്ന രീതിയായിരുന്നു ഉണ്ടായിരുന്നത്. എന്നാല്‍ ഇത്തവണ ഐപിഎല്‍ മാതൃകയിലാണ് (ഡബിൾ റൗണ്ട്-റോബിൻ ഫോര്‍മാറ്റ്) മത്സരങ്ങള്‍ നടത്തുന്നത്. എല്ലാ ടീമുകളും തമ്മില്‍ പരസ്പരം രണ്ടു തവണ ഏറ്റുമുട്ടും. സീസണ്‍ പകുതിയാകുമ്പോഴേക്കും എല്ലാ ടീമുകള്‍ക്കും പകുതി മത്സരങ്ങള്‍ കഴിയുന്ന രീതിയിലാണ് ക്രമീകരണം.

Read More: പ്രോ കബഡിയിലെ പുതിയ പരിഷ്കാരങ്ങളെ സ്വാഗതം ചെയ്ത് ടീമുകള്‍