ഒളിമ്പിക്‌സിൽ മത്സരിച്ച ഇന്ത്യൻ അത്‌ലറ്റ് സിക ഭീതിയിൽ

ബെംഗലൂരു: റിയോ ഒളിമ്പിക്‌സിൽ പങ്കെടുത്ത് നാട്ടിൽ തിരിച്ചെത്തിയ അത്‌ലറ്റിക് ‌താരം സിക വൈറസ് ‌ഭീതിയിൽ. സ്‌റ്റീപ്പിൾ ചേസിൽ ഇന്ത്യയെ പ്രതിനിധീകരിച്ച സുധാ സിംഗിനാണ് വൈറസ് ബാധയേറ്റതായി സംശയമുള്ളത്.

തിരിച്ചെത്തിയ ശേഷം പനിയും സന്ധിവേദനയും അനുഭവപ്പെട്ട സുധാ സിംഗിനെ ബെംഗലൂരുവിലെ ആശുപത്രിയിൽ പ്രവേശിപ്പിച്ചിരിക്കുകയാണ്. താരത്തിന്റെ രക്തസമ്മർദ്ദവും കുറഞ്ഞിരുന്നു. ഇതോടെയാണ് സിക്ക വൈറസ് ‌ബാധിച്ചിട്ടുണ്ടോയെന്ന് ഡോക്‌ടർമാർക്ക് സംശയമുണ്ടായത്.

സുധയുടെ രക്ത സാമ്പിൾ പരിശോധനയ്ക്കായി പൂനെ വൈറോളജി ഇന്‍സ്റ്റിറ്റ്യൂട്ടിലേക്ക് അയച്ചിരിക്കുകയാണ്. ഉത്തർ പ്രദേശ് സ്വദേശിയാണ് 30കാരിയായ സുധ. സുധയുടെ ആരോഗ്യസ്ഥിതിയിൽ പുരോഗതിയുണ്ടെന്ന് ആശുപത്രി അധികൃതർ അറിയിച്ചു.