സ്വർണ്ണം കിട്ടിയില്ലെങ്കിലെന്താ ഡാൻസ് കളിച്ചുകൂടെ...

ഒളിമ്പിക്സിൽ സ്വർണ്ണം നേടുന്നവരുടെ വിജയാഘോഷങ്ങള്‍ നിരവധി നാം കണ്ടിട്ടുണ്ട്. ബോൾട്ടുൾപ്പെടെയുള്ളവരുടെ പ്രത്യേക പോസുകളും സ്വർണ്ണനേട്ടത്തിനുശേഷം ഉണ്ടാകാറുണ്ട്. എന്നാൽ ഒരു മെഡലും കിട്ടിയില്ലെങ്കിലും റിയോയിൽ പങ്കെടുക്കാൻ കഴിഞ്ഞതിൽ മത്സരശേഷം നൃത്തം ചവിട്ടിയ താരത്തിന്‍റെ വീഡിയോ വൈറലാവുകയാണ്.

പസിഫിക് സമുദ്രത്തോടുചേർന്നുള്ള കിരിബത്തി എന്ന ചെറുദ്വീപിൽ നിന്നുള്ള ഭാരദ്വഹന താരമായ ഡേവിഡ് കറ്റ്വറ്റാവു എന്നയാളാണ് റിയോയിൽ നൃത്തത്തിലൂടെ താരമായിരിക്കുന്നത്. കൊടുങ്കാറ്റിൽ തകർന്ന തന്‍റെ വീടും അതുപോലുള്ള നിരവധി വീടുകളും ലോകത്തിന്‍റെ മുന്നിൽ എത്തിക്കാനാണ് തന്‍റെ പരിശ്രമമെന്നാണ് ഇദ്ദേഹം തന്‍റെ വേറിട്ട പ്രകടനത്തിന് കാരണം പറയുന്നത്.



ഗ്ലാസ്ഗോയിൽ കോമൺവെൽത്ത് ഗെയിംസിൽ സ്വർണ്ണം നേടിയപ്പോഴും കറ്റ്വറ്റാവും നൃത്തം ചവിട്ടിയിരുന്നു. അന്ന് ലഭിച്ച തുകകൊണ്ടാണ് ഇദ്ദേഹം വീടുവെച്ചത്. ആ വീട് കൊടുങ്കാറ്റിൽ തകരുകയായിരുന്നു. ഞങ്ങളുടെ ദ്വീപിനെകുറിച്ച് ലോകത്തെ അറിയിക്കാൻ ഇതുപോലുള്ള വേറിട്ട പ്രകടനങ്ങൾ സഹായിക്കുമെന്ന് താരം പറയുന്നു. ഗ്രൂപ്പിൽ പതിനാലാം സ്ഥാനത്തായിട്ടായിരുന്നു താരം റിയോയിൽ എത്തിയത്.