ഹോക്കിയില്‍ അ‍ർജന്‍റീനയെ തോൽപ്പിച്ച് ഇന്ത്യൻ തിരിച്ചുവരവ്

പുരുഷ വിഭാഗം ഹോക്കിയിലെ നിര്‍ണായക മല്‍സരത്തില്‍ ഇന്ത്യയ്ക്കു ജയം. പൊരുതിക്കളിച്ച അര്‍ജന്റീനയെ ഒന്നിനെതിരെ രണ്ടു ഗോളുകള്‍ക്കു തോല്‍പ്പിച്ചാണ് ഇന്ത്യ പ്രതീക്ഷ നിലനിര്‍ത്തിയത്. ഇന്ത്യയ്ക്കായി ചിങ്ക്ലെന്‍സാന കംഗുജാം (8), കേതജിത്ത് സിങ് (35) എന്നിവര്‍ ഗോളുകള്‍ നേടി. അര്‍ജന്റീനയുടെ ആശ്വാസഗോള്‍ ഗോണ്‍സാലോ പിലാറ്റ് (48) സ്വന്തമാക്കി. ആദ്യ മൂന്നു ക്വാര്‍ട്ടര്‍ അവസാനിക്കുമ്പോള്‍ ഇന്ത്യ രണ്ടു ഗോളുകള്‍ക്കു മുന്നിലായിരുന്നു.

ആദ്യമൂന്നു ക്വാര്‍ട്ടറുകളിലും ഇന്ത്യ മേധാവിത്തം പുലര്‍ത്തിയപ്പോള്‍ നാലാം ക്വാര്‍ട്ടറില്‍ അര്‍ജന്റീന ശക്തമായ മല്‍സരം കാഴ്ചവച്ചു. അര്‍ജന്റീനയുടെ ആശ്വാസ ഗോള്‍ വന്നതും അവസാന ക്വാര്‍ട്ടറിലായിരുന്നു. കൂടുതല്‍ ഗോളവസരങ്ങള്‍ അവര്‍ തുറന്നെടുത്തെങ്കിലും മലയാളി കൂടിയായ ക്യാപ്റ്റന്‍ ശ്രീജേഷിന്റെ ഉജ്വല സേവുകള്‍ ഇന്ത്യയുടെ രക്ഷയ്ക്കെത്തി. അര്‍ജന്റീനയുടെ നാലു പെനല്‍റ്റി കോര്‍ണറുകളാണ് ശ്രീജേഷ് തടുത്തിട്ടത്.

ആദ്യ മല്‍സരത്തില്‍ അയര്‍ലന്‍ഡിനെ തോല്‍പ്പിച്ച ഇന്ത്യ രണ്ടാം മല്‍സരത്തില്‍ ജര്‍മനിയോട് അവസാന മിനിറ്റ് ഗോളില്‍ തോല്‍ക്കുകയായിരുന്നു. ഇതോടെയാണ് ഇന്നത്തെ മല്‍സരം ഇന്ത്യയ്ക്കു നിര്‍ണായകമായത്.