ദീപ കർമാക്കറെ ഉറ്റുനോക്കി രാജ്യം; ഫൈനൽ തുടങ്ങി

ചരിത്രനേട്ടത്തിനായി ദിപ കര്‍മാക്കര്‍ ഇന്നിറങ്ങുന്നു. ഇന്ത്യക്കുവേണ്ടി ജിംനാസ്റ്റിക്കിൽ ഇത്തവണ ഒരു ഒളിമ്പിക് മെഡല്‍ നേടാനാകുമോയെന്ന് ഇന്നറിയാം.

ത്രിപുരക്കാരിയായ ദിപയുടെ ഇഷ്ട ഇനമായ ടേബിള്‍ വോള്‍ട്ടില്‍ തന്നെയാണ് ഫൈനല്‍ മത്സരം. മത്സരം തുടങ്ങികഴിഞ്ഞു.

ജിംനാസ്റ്റിക്സില്‍ ഫൈനലിലെത്തുന്ന ആദ്യ ഇന്ത്യന്‍ വനിതയെന്ന നേട്ടമാണു ദിപ സ്വന്തമാക്കിയത്. കോമണ്‍വെല്‍ത്ത് ഗെയിംസിലും ഏഷ്യന്‍ ഗെയിംസിലും ഈയിനത്തില്‍ നേടിയ വെങ്കല മെഡല്‍, ഒളി മ്പിക്സിലും ആവര്‍ത്തിക്കാന്‍ കഴിഞ്ഞാല്‍ ഇന്ത്യക്ക് വലിയ നേട്ടമായിരിക്കും റിയോ സമ്മാനിക്കുക. ടേബിൾ വോള്‍ട്ടില്‍ നാലാം സ്ഥാനം നേടിയാണ് ദിപ ഫൈനലിലേക്കു പ്രവേശിച്ചത്.

ഏറ്റവും ദുഷ്കരമായ പ്രൊദുനോവ വോള്‍ട്ട് വിജയകരമായി പൂര്‍ത്തിയാക്കിയവര്‍ ലോകത്ത് തന്നെ അഞ്ച് പേര്‍ മാത്രമാണ്. ഫൈനലില്‍ മത്സരിക്കുന്നവരില്‍ പ്രൊദുനോവ ചെയ്തവര്‍ ദീപയും ചുസോവിറ്റിനയും മാത്രമാണ്.

അത്ര എളുപ്പമല്ല ദീപക്ക് കാര്യങ്ങള്‍. കൂടെ മത്സരിക്കുന്നത് ജിംനാസ്റ്റിക്സിലെ സൂപ്പര്‍ സ്റ്റാറുകളാണ്. നിലവില്‍ ലോകത്തില്‍ ഏറ്റവും മികച്ച ജിംനാസ്റ്റിക്സ് താരമെന്ന് കരുതുന്ന സിമോണ്‍ ബില്‍സ്, ഏഴ് ഒളിംപിക്സുകളില്‍ പങ്കെടുത്തിട്ടുള്ള ചുസോവെറ്റിന, ലണ്ടനിലെ വെങ്കല മെഡല്‍ ജേതാവ് മരിയ പസേക്ക, ബെയ്ജിങില്‍ സ്വര്‍ണം നേടിയ ജോങ് ഉന്‍ ഹോങ്.


പ്രതിഭകളുടെ സംഗമമാണ് ജിംനാസ്റ്റിക്സ് വോള്‍ട്ട് ഫൈനല്‍. പക്ഷേ പരിക്കേറ്റിട്ടും പിന്മാറാതെ കോമണ്‍വെല്‍ത്ത് ഫൈനലില്‍ വെങ്കലം നേടിയത് പോലെ ഒരു പ്രകടനമാണ് ദീപയില്‍ നിന്ന് ഇന്ത്യ പ്രതീക്ഷിക്കുന്നത്.