റിയോ ഒളിമ്പിക്സിന് ഇന്ന് ദീപം തെളിയും

റിയോ ഡെ ജനീറോയിലെ മാറക്കാന സ്റ്റേഡിയത്തില്‍ വെള്ളിയാഴ്ച രാത്രി എട്ടിന് (ഇന്ത്യന്‍ സമയം ശനിയാഴ്ച പുലര്‍ച്ചെ 4.30) ലോകത്തെ ഏറ്റവും വലിയ കായികമാമാങ്കത്തിന് ദീപം തെളിയും. ബ്രസീലിന്‍െറ വൈവിധ്യമാര്‍ന്ന കലാ സാംസ്കാരിക പാരമ്പര്യത്തിന്‍റെ മഹത്വം തെളിയിക്കുന്നതാണ് ഉദ്ഘാടന വിരുന്ന്. തുടര്‍ന്ന് കായികതാരങ്ങളുടെ മാര്‍ച്ച് പാസ്റ്റ് നടക്കും.

തെക്കേ അമേരിക്കന്‍ ഭൂഖണ്ഡത്തില്‍ ഇതാദ്യമായി നടക്കുന്ന ഒളിമ്പിക്സില്‍ 206 രാജ്യങ്ങളില്‍നിന്നുള്ള 10,500 ലേറെ താരങ്ങളാണ് കഴിവ് തെളിയിക്കാനെത്തുന്നത്. 306 സ്വര്‍ണമെഡലുകളാണ് വിജയികളെ കാത്തിരിക്കുന്നത്. ഫുട്ബോള്‍ മത്സരങ്ങള്‍ രണ്ടുദിവസം മുമ്പ് ആരംഭിച്ചു കഴിഞ്ഞു. ഉദ്ഘാടനദിവസം അമ്പെയ്ത്ത് മാത്രമാണ് നടക്കുക. ദക്ഷിണ സുഡാനും കൊസോവോയും ഒളിമ്പിക്സില്‍ അരങ്ങേറ്റംകുറിക്കാന്‍ എത്തുന്നതും റഗ്ബി സെവന്‍സും ഗോള്‍ഫും ഇടവേളക്കുശേഷം ലോകവേദിയിലേക്ക് തിരിച്ചെത്തുന്നതും റിയോയിലെ പ്രത്യേകതകളാണ്.

ലോകമെങ്ങുമുള്ള അഭയാര്‍ഥികളുടെ ആശയായി 10 കായികതാരങ്ങള്‍ ഇതാദ്യമായി മത്സരിക്കുന്നുവെന്ന പ്രത്യേകതയുമുണ്ട്.

എന്നാൽ 2016 റയോ ഒളിമ്പിക്സിന് അരങ്ങുണരുമ്പോൾ ഇന്ത്യയ്ക്ക് മെഡൽ പ്രതീക്ഷകൾ ഏറെയാണ്. കാരണം 120 അത്ലറ്റുകളാണ് ഈ ഒളിമ്പിക്സിന് യോഗ്യത നേടി ഇന്ത്യയ്ക്കായി മത്സരിക്കുന്നത്. ആദ്യമായാണ് ഇത്രയധികം പേർ രാജ്യത്തിനായി ഒളിമ്പിക്സ് മത്സരങ്ങൾക്കിറങ്ങുന്നത്.