പ്രധാനമന്ത്രിയുടെ ഒളിംപിക്സ് ദൗത്യ സംഘം പട്ടിക

പ്രധാനമന്ത്രിയുടെ ഒളിംപിക്സ് ദൗത്യസംഘത്തിൽ ബാഡ്മിന്റന്‍ കോച്ച്‌ പുല്ലേല ഗോപീചന്ദ്, ജിംനാസ്റ്റിക്സ് പരിശീലകന്‍ ബിശ്വേശ്വര്‍ നന്ദി, ഷൂട്ടിങ് താരം അഭിനവ് ബിന്ദ്ര എന്നിവരടക്കം 12 പേരുകള്‍ കേന്ദ്ര കായിക മന്ത്രാലയം പ്രധാനമന്ത്രി നരേന്ദ്ര മോദിയുടെ അംഗീകാരത്തിനായി സമര്‍പ്പിച്ചു.

2020 ടോക്കിയോ ഒളിംപിക്സിലും 2024, 2028 ഒളിംപിക്സുകളിലും ഇന്ത്യന്‍ താരങ്ങളുടെ പ്രകടനം മികച്ചതാക്കുകയും മെഡല്‍ നേട്ടം ഉറപ്പാക്കുകയുമാണ് ടാസ്ക് ഫോഴ്സിന്റെ ലക്ഷ്യം. റിയോ ഒളിംപിക്സില്‍ വെറും രണ്ടു മെഡലുകള്‍ മാത്രമാണ് ഇന്ത്യയ്ക്കു നേടാനായത്.

സ്പോര്‍ട്സ് അതോറിറ്റി ഓഫ് ഇന്ത്യ (സായി) ഡയറക്ടര്‍ ഇന്‍ജട്ടി ശ്രീനിവാസ്, കേന്ദ്ര കായിക സെക്രട്ടറി രാജീവ് യാദവ് എന്നിവരും ദൗത്യ സംഘത്തിലുണ്ടാകുമെന്നാണ് സൂചന. മറ്റു ചില താരങ്ങളും പരിശീലകരും അഡ്മിനിസ്ട്രേറ്റര്‍മാരും സംഘത്തില്‍ ഇടംപിടിച്ചിട്ടുണ്ട്. എന്നാല്‍ ഇവരുടെ പേരുകള്‍ പുറത്തുവിട്ടിട്ടില്ല.

വിദേശ സന്ദര്‍ശനത്തിലുള്ള മോദി തിരിച്ചെത്തിയ ശേഷമേ സംഘത്തിന് അംഗീകാരം നല്‍കുകയുള്ളൂ. ഇപ്പോള്‍ സമര്‍പ്പിച്ചിരിക്കുന്ന പട്ടികയില്‍നിന്ന് ചിലര്‍ ഒഴിവാകാനും മറ്റു ചിലര്‍ ഉള്‍പ്പെടാനും സാധ്യതയുണ്ട്.