പ്രസിഡന്റ് സ്ഥാനത്തുനിന്ന് അഞ്‍ജു പിന്മാറിയേക്കും

സംസ്ഥാന സ്പോര്‍ട്സ് കൗണ്‍സില്‍ പ്രസിഡന്റ് സ്ഥാനത്തുനിന്ന് ഒളിംപ്യന്‍ അഞ്‍ജു ബോബി ജോര്‍ജ് പിന്മാറാൻ സാധ്യത. കായിക മന്ത്രി ഇ.പി.ജയരാജന്‍ മോശമായി സംസാരിച്ചു എന്ന വിവാദത്തെ തുടര്‍ന്നാണ് നടപടി . ഇത് ചൂണ്ടിക്കാട്ടി മുഖ്യമന്ത്രി പിണറായി വിജയന് അഞ്ജു പരാതി നല്‍കിയിരുന്നു. അഞ്ജു അടക്കം സ്പോര്‍ട്സ് കൗണ്‍സിലില്‍ മുഴുവന്‍ അഴിമതിക്കാരും പാര്‍ട്ടി വിരുദ്ധരുമാണെന്ന് ആരോപിച്ചു കായിക മന്ത്രി തട്ടിക്കയറിയിരുന്നു.

പുതിയ കായിക മന്ത്രി ചുമതലയേറ്റ ശേഷം അദ്ദേഹത്തെ ആദ്യമായി കാണാന്‍ എത്തിയതായിരുന്നു ബെംഗളൂരുവില്‍ കസ്റ്റംസ് ഉദ്യോഗസ്ഥയായ അഞ്ജു. . നുണ പറഞ്ഞ് തനിക്ക് ഒന്നും നേടേണ്ടെന്നും, സര്‍ക്കാര്‍ ആവശ്യപ്പെട്ടാല്‍ സ്പോര്‍ട്സ് കൗണ്‍സില്‍ പ്രസിഡന്റ് സ്ഥാനം ഒഴിയുമെന്നും അഞ്ജു ബോബി ജോര്‍ജ് പറഞ്ഞു.

ഒരു സ്ഥാനവും ചോദിച്ചു വാങ്ങിയിട്ടില്ല. എന്തെങ്കിലും അഴിമതി കാണിച്ചിട്ടുണ്ടെങ്കില്‍ ന്യായത്തോടെ അതു നിരത്താം. ഇതിലും വലിയ പദവി താന്‍ കേന്ദ്ര മന്ത്രാലയത്തില്‍ വഹിക്കുന്നുണ്ട്. സ്പോര്‍ട്സ് കൗണ്‍സിലിനു 30 കോടി രൂപയാണു പ്രതിവര്‍ഷം ലഭിക്കുന്നത്. അതു ശമ്പളം കൊടുക്കാന്‍ പോലും തികയില്ല. ഇങ്ങനെയിരിക്കെ എന്ത് അഴിമതി കാണിക്കാനാണ്.

സ്ഥാനമാനത്തിനുവേണ്ടി ആരോടും ആവശ്യപ്പെട്ടില്ല. സര്‍ക്കാര്‍ ആവശ്യപ്പെട്ടാല്‍ സ്ഥാനത്തു തുടരും. അല്ലെങ്കില്‍ പോകും. അപമാനിതയാകേണ്ടിവരില്ലെന്നു 100 ശതമാനം ഉറപ്പുണ്ട്. അന്വേഷണമുണ്ടായാ‍ല്‍ സഹകരിക്കുമെന്നും അഞ്ജു പറഞ്ഞു.