ലോക ബോക്സിങ് ചാമ്പ്യൻഷിപ്പ് ഫൈനലിൽ എത്തുന്ന ആദ്യ ഇന്ത്യൻ താരമായി അമിത് പങ്കൽ

ന്യൂഡൽഹി: ലോക ബോക്സിങ് ചാമ്പ്യൻഷിപ്പിൽ ചരിത്രം രചിച്ച് ഇന്ത്യൻ താരം അമിത് പങ്കൽ. ഏഷ്യൻ ചാമ്പ്യനായ അമിത് ലോക ബോക്സിങ് ചാമ്പ്യൻഷിപ്പ് ഫൈനലിൽ ഇടം പിടിക്കുന്ന ആദ്യ ഇന്ത്യൻ പുരുഷ താരമാണ്. 52 കിലോഗ്രാം വിഭാഗത്തിൽ കസാകിസ്ഥാൻെറ സാകെൻ ബിബോസിനോവിനെയാണ് പങ്കൽ പരാജയപ്പെടുത്തിയത്.

സെമിഫൈനലിൽ 3-2നാണ് കസകിസ്ഥാൻ താരത്തെ പരാജയപ്പെടുത്തിയത്. ശനിയാഴ്ച നടക്കുന്ന ഫൈനലിൽ പങ്കൽ ഉസ്ബകിസ്ഥാൻെറ ഷകോബിദിൻ ഷോയ്റോവിനെയാണ് നേരിടുക. ഫൈനലിൽ വിജയിച്ചാൽ അപൂർവ നേട്ടമാണ് ഇന്ത്യൻ താരത്തെ കാത്തിരിക്കുന്നത്. ലോക ബോക്സിങ് ചാമ്പ്യൻഷിപ്പിൽ സ്വർണമെഡൽ നേടുന്ന ആദ്യ ഇന്ത്യൻ പുരുഷ താരമായി പങ്കൽ മാറും.

Read More: ലോക റെ‍സ‍്‍ലിങ് ചാമ്പ്യൻഷിപ്പിൽ സുശീൽ കുമാറിന് ഒന്നാം റൗണ്ടിൽ തോൽവി

അതേ സമയം കോമൺവെൽത്ത് വെള്ളിമെഡൽ ജേതാവായ ഇന്ത്യൻ താരം മനീഷ് കൗശിക് വെങ്കലമെഡൽ സ്വന്തമാക്കി. 63 കിലോഗ്രാം സെമിഫൈനലിൽ ക്യൂബയുടെ ആൻഡി ഗോമസ് ക്രൂസിനോടാണ് കൗശിക് പരാജയപ്പെട്ടത്. 5-0നാണ് ഇന്ത്യൻ താരത്തിൻെറ തോൽവി.