ശാർദുൽ വിഹാൻ ഏഷ്യാഡ് മെഡൽ നേടുന്ന പ്രായം കുറഞ്ഞ ഇന്ത്യക്കാരൻ

ന്യൂഡൽഹി: ഏഷ്യൻ ഗെയിംസിൽ മികച്ച പ്രകടനത്തോടെ ചരിത്രം രചിക്കുകയാണ് ഇന്ത്യൻ ഷൂട്ടർമാർ. കഴിഞ്ഞ ദിവസം 16കാരനായ സൗരഭ് ചൗധരി ഷൂട്ടിങിൽ ഇന്ത്യക്കായി സ്വർണമെഡൽ നേടിയിരുന്നു. എന്നാലിതാ സൗരഭിൻെറ വഴിയേ വെള്ളിമെഡൽ നേടി ഇന്ത്യയുടെ അഭിമാനമായിരിക്കുകയാണ് 15കാരനായ ശാർദുൽ വിഹാൻ.

ഏഷ്യൻ ഗെയിംസിൽ ഷൂട്ടിങിൽ മെഡൽ നേടുന്ന ഏറ്റവും പ്രായം കുറഞ്ഞ ഇന്ത്യക്കാരനാണ് ഈ ഒമ്പതാം ക്ലാസ്സുകാരൻ. സൗരഭിൻെറ സ്ഥലമായ മീററ്റിൽ നിന്ന് തന്നെയാണ് ശാർദുലിൻെറയും വരവ്. ഡബിൾ ട്രാപ്പിലാണ് ശാർദുൽ വെള്ളിമെഡൽ നേടിയത്. ഫലം നിശ്ചയിച്ചതിലുണ്ടായ ചെറിയ സാങ്കേതിക പിഴവാണ് താരത്തിന് സ്വർണമെഡൽ നഷ്ടമാക്കിയതെന്നും റിപ്പോർട്ടുണ്ട്.