'നീ സെക്സിയാണ്, ഹോട്ടുമാണോ?' ബോള്‍ഗേളിനെ കമന്‍റടിച്ച അമ്പയര്‍ക്ക് കിട്ടിയ പണി

മിലാന്‍: പുരുഷന്മാരുടെ ടെന്നീസ് മത്സരത്തിനിടെ ബോള്‍ ഗേളിനെതിരെ അപമര്യാദയായി പെരുമാറിയ സംഭവത്തില്‍ അമ്പയര്‍ക്ക് വിലക്ക്. ഇറ്റാലിയന്‍ ടെന്നീസ് അമ്പയറായ ജിയാന്‍ലൂക്ക മോസറെല്ലയെയാണ് എടിപി അന്വേഷണ വിധേയമായി സസ്പെന്‍ഡ് ചെയ്തിരിക്കുന്നത്. ഇറ്റലിയിലെ ഫ്ലോറെന്‍സില്‍ നടന്ന സെക്കന്‍റ് ടയര്‍ ചലഞ്ചര്‍ ടൂര്‍ണമെന്‍റില്‍ പെഡ്രോ സൗസയും എന്‍റികോ ഡാലയും തമ്മിലുള്ള മത്സരം നടക്കുന്നതിനിടെയാണ് മോസറെല്ല പെണ്‍കുട്ടിയോട് മോശം ഭാഷയില്‍ പെരുമാറിയത്.

അമ്പയറുടെ സംസാരത്തിന്‍റെ വീഡിയോയും ശബ്ദശകലങ്ങളും പുറത്ത് വന്നതോടെയാണ് ഇദ്ദേഹത്തിന് പിടിവീണത്. മത്സരത്തിന്‍റെ ഇടവേളയില്‍ തന്‍റെ അരികില്‍ നില്‍ക്കുകയായിരുന്ന ബോള്‍ ശേഖരിക്കുന്ന പെണ്‍കുട്ടിയോട് കോര്‍ട്ട് മൈക്രോഫോണ്‍ ഉപയോഗിച്ചാണ് മോസറെല്ല സംസാരിച്ചത്. നീ അതീവ സുന്ദരിയാണെന്നും സെക്സിയാണെന്നും പെണ്‍കുട്ടിയോട് പറഞ്ഞതിനൊപ്പം തന്നെ ശാരീരികമായും വൈകാരികമായും നീ ഹോട്ടാണോ എന്നും കുട്ടിയോട് ചോദിച്ചു.

Also Read: മലയാളി താരം അര്‍ജുന്‍ ജയരാജിനെ ബ്ലാസ്റ്റേഴ്സ് ടീമില്‍ നിന്നും ഒഴിവാക്കിയത് എന്തിന്?

ഇതിനൊപ്പം തന്നെ ഇതേ മത്സരത്തില്‍ അമ്പയര്‍ നടത്തിയ മറ്റ് ചില കാര്യങ്ങളുടേയും വീഡിയോ എടിപിയ്ക്ക് ലഭിച്ചിട്ടുണ്ട്. ശുചിമുറിയില്‍ പോകുന്ന താരങ്ങളോട് രണ്ട് മിനുട്ടിനുള്ളില്‍ തിരിച്ച് വരാന്‍ ആവശ്യപ്പെടുന്നതിന്‍റെ വീഡിയോയും പുറത്തായിട്ടുണ്ട്. പെ‍ഡ്രോയും ഡാലയും തമ്മിലുള്ള മത്സരത്തിനിടെ പെ‍ഡ്രോയ്ക്ക് അമ്പയര്‍ ഉപദേശം നല്‍കുന്നതിന്‍റെ ശബ്ദശകലവും പുറത്ത് വന്നിട്ടുണ്ട്.

ഇതിന് പിന്നാലെ അമ്പയര്‍ക്കെതിരെ രൂക്ഷ വിമര്‍ശനമാണ് വിവിധ കോണുകളില്‍ നിന്ന് ഉയര്‍ന്നത്. നിരവധി പ്രമുഖര്‍ വിമര്‍ശനവുമായി രംഗത്തെത്തി. ഇതോടെ വിഷയത്തില്‍ വിശദീകരണവുമായി എ ടി പി രംഗത്ത് വന്നു. മത്സരത്തില്‍ നിന്ന് മോസറെല്ലയെ അടിയന്തിരമായി നീക്കിയതായും വിഷയത്തില്‍ വിശദമായ അന്വേഷണം നടത്താന്‍ ഉത്തരവ് നല്‍കിയതായും എ ടി പി അറിയിച്ചു.