ഒളിംപിക്സ് യോഗ്യത ലക്ഷ്യമിട്ട് ഇന്ത്യന്‍ സംഘം പോളണ്ടിലേക്ക്

ഒളിംപിക്സ് യോഗ്യത ലക്ഷ്യമിട്ട് വിദഗ്ധ പരിശീലനത്തിനായി 40 അംഗ ഇന്ത്യന്‍ അത്ലറ്റിക് സംഘം പോളണ്ടിലെ സ്പാലയിലേക്കു പോകുന്നു. നാളെ യാത്ര തിരിക്കുന്ന ആദ്യ സംഘത്തില്‍ എട്ടു മലയാളികളുണ്ട്. 400 മീ. റിലെ, ജാവലിന്‍ ത്രോ, 20 കി.മീ. നടത്തം എന്നീ ഇനങ്ങളിലെ താരങ്ങളാണു സംഘത്തിലുള്ളത്. നാലു മലയാളികളുള്‍പ്പെടെ 24 ഇന്ത്യന്‍ അത്ലീറ്റുകളാണ് ഇതുവരെ ഒളിംപിക്സ് യോഗ്യത നേടിയത്.

ഇന്ത്യന്‍ ഗ്രാന്‍പ്രീയുടെ രണ്ടുഘട്ടങ്ങള്‍, ഫെഡറേഷന്‍ കപ്പ് എന്നീ ആഭ്യന്തര യോഗ്യതാ മല്‍സരങ്ങള്‍ പൂര്‍ത്തിയായി. മൂന്നു മീറ്റുകളില്‍ നിന്നായി 3000 മീ. സ്റ്റീപ്പിള്‍ ചേയ്സില്‍ സുധാ സിങ് മാത്രമാണു റിയോ ടിക്കറ്റ് നേടിയത്. അടുത്തമാസം ഹൈദാരാബാദില്‍ നടക്കുന്ന അന്തര്‍ സംസ്ഥാന അത്ലറ്റിക് ചാംപ്യന്‍ഷിപ് മാത്രമാണ് ഇനി ബാക്കിയുള്ള ആഭ്യന്തര യോഗ്യതാ മല്‍സരം. ബെയ്ജിങ്, തായ്വാന്‍, കസാഖിസ്ഥാന്‍, കിര്‍ഗിസ്ഥാന്‍ എന്നിവിടങ്ങളിലെ യോഗ്യതാ മല്‍സരങ്ങളിലാണു പോളണ്ട് പരിശീലനത്തിനിടെ ഇന്ത്യന്‍ ടീം പങ്കെടുക്കുന്നത്.

400 മീ, 400 മീ ഹഡില്‍സ്, 4-400 മീ. റിലേ ഇനങ്ങളില്‍ യോഗ്യത തേടുന്ന 19 പേര്‍ സംഘത്തിലുണ്ട്. സിനി ജോസ്, അനില്‍ഡ തോമസ്, അനു രാഘവന്‍, അഞ്ജു തോമസ്, കുഞ്ഞുമുഹമ്മദ്, മുഹമ്മദ് അനസ്, ജിതിന്‍ പോള്‍, സജിന്‍ വിജയകുമാരന്‍ തുടങ്ങിയവരാണ് ഈ സംഘത്തിലെ മലയാളികള്‍. കണ്ണൂര്‍ സ്വദേശി മുഹമ്മദ് കുഞ്ഞി പരിശീലക സംഘത്തിലുണ്ട്. എം.ആര്‍. പൂവമ്മ, അരോക്യ രാജീവ്, അശ്വിനി അക്കുഞ്ചി എന്നിവരും സംഘത്തിലുണ്ട്.