അഞ്ജുവിനെതിരെ നിയമ നടപടിക്ക് ബോബി അലോഷ്യസ്

തിരുവനന്തപുരം: അഞ്ജു ബോബി ജോര്‍ജിന്‍റെ തുറന്ന കത്തിലെ പരാമര്‍ശങ്ങള്‍ക്കെതിരെ സ്പോര്‍ട്സ് കൗൺസിൽ മുൻ അസിസ്റ്റന്‍റ് സെക്രട്ടറി ബോബി അലോഷ്യസ് നിയമ നടപടിക്ക്. അഴിമതിയുടെ പുകമറയിൽ അൽപ്പനേരം പോലും നിൽക്കാൻ താൻ തയ്യാറല്ലെന്ന് ബോബി അലോഷ്യസ് തന്‍റെ ഫേസ്ബുക്ക് പേജിൽ കുറിച്ചു.

അഞ്ജു ഉയര്‍ത്തിയ ആരോപണങ്ങള്‍ ഉള്‍പ്പടെ എല്ലാകാര്യങ്ങളും അന്വേഷിക്കണമെന്ന് വിജിലൻസ് ഡയറക്ടര്‍ ജേക്കബ് തോമസിനോട് ആവശ്യപ്പെടുമെന്ന് ബോബി മാധ്യമങ്ങളോട് പറഞ്ഞു.



വിദേശ പരിശീലനത്തിന്‍റെ പേരിൽ പലരും ലക്ഷങ്ങള്‍ കയ്പറ്റിയിട്ടുണ്ടെങ്കിലും അതിന്‍റെ നിബന്ധനകളിൽ പറയന്ന പ്രകാരം പരീക്ഷകള്‍ ജയിച്ചിട്ടുണ്ടോ, കേരള സ്പോര്‍ട്സിന് സൗജന്യ സേവനം നൽകിയിട്ടുണ്ടോ, തുടങ്ങിയ കാര്യങ്ങളും അഴിമതിയുടെ കളത്തിൽ തന്നെ ഉള്‍പ്പെടുത്തണമെന്ന് അഞ്ജു ബോബി ജോര്‍ജ് മന്ത്രി ഇ.പി. ജയരാജന് അയച്ച തുറന്ന കത്തിൽ പറഞ്ഞിരുന്നു.

തന്‍റെ പേരെടുത്ത് പറയുന്നില്ലെങ്കിലും ഇൗ പരാമര്‍ശം തന്നെ സംശയത്തിന്‍റെ നിഴലിലാക്കുന്നുവെന്ന് ബോബി ആരോപിച്ചു. 2013-2015 കാലഘട്ടത്തിലെ സ്പോര്‍ട്സ് കൗൺസിൽ സാങ്കേതിക വിഭാഗത്തിന്‍റെ ചുമതല അസിസ്റ്റന്‍റ് സെക്രട്ടറി കൂടിയായിരുന്ന ബോബി അലോഷ്യസിനായിരുന്നു.2004ൽ ബോബി വിദേശ പരിശീലനത്തിന് പോയിരുന്നു. ഇൗ സാഹചര്യങ്ങളുടെ വെളിച്ചത്തിലാണ് നിയമ നടപടിക്ക് ഒരുങ്ങുന്നത്.