ഷൂട്ടർ അനീഷിനായി CBSE പ്രത്യേക പരീക്ഷ നടത്തും

പൂനെ: ഇന്ത്യയുടെ പിസ്റ്റൾ ഷൂട്ടർ അനീഷ് ഭൻവാലിനായി(15) പ്രത്യേക പരീക്ഷ നടത്താൻ അനുമതിയായി. മെക്സിക്കോയിൽ നടക്കുന്ന സീനിയ‍ര്‍ വേള്‍ഡ് കപ്പിൽ പങ്കെടുക്കുന്നതിനായി പോകുന്നതിനാൽ പത്താം ക്ലാസ് ബോര്‍ഡ് പരീക്ഷ നഷ്ടമാകുന്ന സാഹചര്യത്തിലാണ് മൂന്ന് വിഷയങ്ങളിൽ പ്രത്യേക പരീക്ഷ നടത്താൻ സിബിഎസ്ഇ തീരുമാനിച്ചിരിക്കുന്നത്.

ഈ വർഷത്തെ ടിഒഐ സ്പോർട്സ് പുരസ്കാരങ്ങളിൽ എമർജിംഗ് പ്ലെയ‍ർ പുരസ്കാരം അനീഷിനായിരുന്നു. മെക്സിക്കോയിൽ നടക്കുന്ന ലോകകപ്പ്, ഓസ്ട്രേലിയായിൽ നടക്കുന്ന ജൂനിയർ വേള്‍ഡ് കപ്പ്, കോമൺ വെൽത്ത് ഗെയിംസ്, കൊറിയയിൽ നടക്കുന്ന വേള്‍ഡ് കപ്പ് എന്നിവയിൽ പങ്കെടുക്കുന്നതിനാലാണ് ഹിന്ദി, സാമൂഹ്യശാസ്ത്രം, ഗണിതം പരീക്ഷകള്‍ അനീഷിന് നഷ്ടമാകുന്നത്.

സ്പോര്‍ട്സ് അതോറിറ്റി ഓഫ് ഇന്ത്യയാണ് സിബിഎസ്ഇയ്ക്ക് നിവേദനം നൽകിയിരുന്നത്. രാജ്യത്തിന്‍റെ അഭിമാനമായി കായികതാരങ്ങളെ വാ‍ർത്തെടുക്കുന്നതിനായാണ് ഇത്തരത്തിലൊരു സാഹചര്യത്തിൽ അനീഷിന് അനുകൂലമായി പരീക്ഷ നടത്താൻ സിബിഎസിഇയോട് ആവശ്യപ്പെട്ടതെന്ന് സായി ഡയറക്ടർ ജനറൽ നീലം കപൂർ പ്രതികരിച്ചു. സിബിഎസ്ഇ വിദ്യാ‍ർഥികൾക്ക് ഇത്തരത്തിലൊരു സൗകര്യം നൽകുന്നത് ആദ്യമായാണെന്ന് സിബിഎസ്ഇ ചീഫ് അനിത കർവാൽ വ്യക്തമാക്കി.

അനീഷിനെ കൂടാതെ അണ്ടർ-18 കാറ്റഗറിയിൽ മാനവ് താക്കർ(ടേബിൾ ടെന്നീസ്) സായിയെ ഇതേ ആവശ്യവുമായി സമീപിച്ചിട്ടുണ്ട്. മാ‍ർച്ച് 22, 28 തിയതികളിലെ പരീക്ഷകളാണ് അനീഷിന് നഷ്ടമാകുന്നത്. കോമൺവെൽത്ത് ഗെയിംസിന് ശേഷം ഏപ്രിൽ 15നാണ് അനീഷ് എത്തുന്നത്. ഏപ്രിൽ 16, 17, 18 തിയതികളിലായി അനീഷിനായി പ്രത്യേക പരീക്ഷ നടത്തും. ഏപ്രിൽ 18ന് അനീഷ് കൊറിയ വേള്‍ഡ് കപ്പിനായി തിരിക്കുമെന്ന് അനീഷിന്‍റെ അച്ഛൻ ജഗ്പാൽ ഭൻവാൽ പറഞ്ഞു.