മാഞ്ചസ്റ്ററിനെ തുരത്തി ചെല്‍സി എഫ്‍എ കപ്പ് സെമിയില്‍

കളിക്കാര്‍ക്കു പുറമെ പരിശീലകരും ഏറ്റുമുട്ടിയ എഫ്‍എ കപ്പ് ക്വാര്‍ട്ടര്‍ ഫൈനലില്‍ ചെല്‍സി, മാഞ്ചസ്റ്റര്‍ യുണൈറ്റഡിനെ തോല്‍പ്പിച്ചു.

ഏകപക്ഷീയമായ ഒരു ഗോളിനാണ് സ്വന്തം തട്ടകത്തില്‍ ചെല്‍സിയുടെ വിജയം. എന്‍ഗൊളൊ കാന്‍റെയാണ് ഫ്രീ-കിക്കിലൂടെ 51-ാം മിനിറ്റില്‍ ഗോള്‍ നേടിയത്.

മത്സരത്തിലെ വഴിത്തിരിവ് യുണൈറ്റഡ് താരം ആന്‍ഡെര്‍ ഹെറേറയുടെ പുറത്താകലായിരുന്നു. ചെല്‍സി താരം ഹസാര്‍ഡിനെ യുണൈറ്റഡ് താരങ്ങള്‍ നിരന്തരം ഫൗള്‍ ചെയ്‍തതിന് റഫറി മുന്നറിയിപ്പ് നല്‍കിയശേഷം ഹെറേറ നടത്തിയ ഫൗളിന് റഫറി രണ്ടാം മഞ്ഞക്കാര്‍ഡും ചുവപ്പുകാര്‍ഡും വിധിച്ചു.

ഇത് യുണൈറ്റഡ് പരിശീലകന്‍ ഹോസെ മൗറീന്യോയെ ചൊടിപ്പിച്ചു. ചെല്‍സി പരിശീലകന്‍ ആന്‍റോണിയോ കോന്‍റെയുമായി നിരന്തരം വാക്കേറ്റത്തിന് മുതിര്‍ന്ന മൗറീന്യോയെ റഫറി ശാസിക്കുകയും ചെയ്‍തു.

പത്തു പേരുമായി രണ്ടാം പകുതി കളിച്ച യുണൈറ്റഡ് തീര്‍ത്തും നിറംമങ്ങി. പ്രീമിയര്‍ ലീഗില്‍ കുതിപ്പ് തുടരുന്ന ചെല്‍സി ആഭ്യന്തര സീസണിലെ രണ്ടാം കിരീടമാണ് എഫ്എ കപ്പിലൂടെ ലക്ഷ്യമിടുന്നത്.

Chelsea down Manchester to book FA Cup Semifinal

Chelsea has prevailed over Manchester United to book a semifinal berth in the English FA cup.