നോബോളിനെചൊല്ലി തർക്കം; യുവാവിനെ കൊലപ്പെടുത്തി

ക്രിക്കറ്റ് കളിക്കിടെ നോബോളിനെ ചൊല്ലിയുണ്ടായ തര്‍ക്കം ക്രിക്കറ്റ് താരത്തിന്‍റെ ജീവനെടുത്തു. ബംഗ്ലാദേശ് തലസ്ഥാനമായ ധാക്കയില്‍ ബുധനാഴ്ചയായിരുന്നു സംഭവം. പതിനാറുകാരനായ ബാബുല്‍ ഷിക്ദറാണ് എതിര്‍ ടീമിലെ ബാറ്റ്‌സ്മാന്റെ സ്റ്റംപ് കൊണ്ടുള്ള അടിയേറ്റുമരിച്ചത്.

ധാക്കയില്‍ അയല്‍ക്കാര്‍ തമ്മില്‍ നടന്ന ആഭ്യന്തര ക്രിക്കറ്റ് മത്സരത്തിനിടെയാണ് ദാരുണമായ സംഭവം ഉണ്ടായത്. ബാബുല്‍ തന്റെ ടീമിന്റെ വിക്കറ്റ് കീപ്പറായിരുന്നു. മത്സരത്തിനിടെ അമ്പയര്‍ നോബോള്‍ വിളിച്ചതുമായി ബന്ധപ്പെട്ട് ബാബുല്‍ തര്‍ക്കിച്ചതാണ് ആക്രമണത്തില്‍ കലാശിച്ചത്.

ബാറ്റ്‌സ്മാനെ ഔട്ട് വിധിച്ച അമ്പയറെ പരിഹസിച്ച് ബാബുല്‍ സംസാരിച്ചു. തൊട്ട് മുന്‍പത്തെ ബോളില്‍ ബാറ്റ്‌സ്മാന്‍ ഔട്ടായെങ്കിലും അമ്പയര്‍ നോബോള്‍ വിളിച്ചതാണ് ബാബുലിനെ ചൊടിപ്പിച്ചത്. ഔട്ടായ പന്തും അമ്പയര്‍ക്ക് ഇതുപോലെ നോബോള്‍ വിളിച്ച് ബാറ്റ്‌സ്മാനെ രക്ഷിക്കാമായിരുന്നെന്ന് ബാബുല്‍ പറഞ്ഞു. ഇതില്‍ കുപിതനായ ബാറ്റ്‌സ്മാന്‍ സ്റ്റംപ് ഊരി ബാബുലിന്റെ തലയ്ക്ക് പിറകില്‍ അടിക്കുകയായിരുന്നു. അടിയേറ്റ് കളത്തില്‍ വീണ ബാബുല്‍ ആശുപത്രിയിലേക്ക് കൊണ്ടുപോകും വഴിയാണ് മരിച്ചത്. സംഭവത്തെ തുടര്‍ന്ന് പ്രതി ഒളിവില്‍ പോയി. ഇയാള്‍ക്കായി പോലീസ് തിരച്ചില്‍ തുടരുകയാണ്.