കൊൽക്കത്തയിൽ ആരാധകർ വളഞ്ഞു: ക്ഷുഭിതനായി മറഡോണ

കൊൽക്കത്ത: ആരാധകർ കാറിനെ വളഞ്ഞതോടെ കൊൽക്കത്തയിൽ നിയന്ത്രണം വിട്ട് ക്ഷുഭിതനായി ഫുട്ബോൾ ഇതിഹാസം ഡീഗോ മറഡോണ. മൂന്ന് ദിവസത്തെ സന്ദർശനത്തിനായി കൊൽക്കത്തയിലെത്തിയതാണ് അദ്ദേഹം. ഒരു പരിപാടിയിൽ പങ്കെടുക്കാനായി ചെന്ന അദ്ദേഹത്തിന് ആരാധകരുടെ തിരക്ക് കാരണം കാറിന് പുറത്തിറങ്ങാൻ കഴിഞ്ഞില്ല.

ഇത് രണ്ടാം തവണയാണ് മറഡോണ കൊൽക്കത്ത സന്ദർശിക്കുന്നത്. ഇതിൽ തനിക്ക് ഏറെ സന്തോഷമുണ്ടെന്നും അദ്ദേഹം പറഞ്ഞിരുന്നു. പക്ഷേ ആരാധകർ വളഞ്ഞതോടെ അദ്ദേഹത്തിൻെറ സന്തോഷമെല്ലാം അൽപ നേരത്തേക്ക് ദേഷ്യത്തിലേക്ക് വഴി മാറി.

ആൾക്കൂട്ടം വളഞ്ഞതോടെ അദ്ദേഹം ക്ഷുഭിതനായി കാറിൽ തന്നെ ഇരുന്നു. ഒരു മണിക്കൂറോളം കാറിൽ നിന്ന് പുറത്തിറങ്ങിയതേയില്ല. ഒടുവിൽ പരിപാടിയുടെ സംഘാടകർക്കും കാര്യം മനസ്സിലായി. പരിപാടിയിൽ പങ്കെടുക്കാതെ മറഡോണ ഹോട്ടലിലേക്ക് തിരിച്ച് പോവുകയും ചെയ്തു.