റയലിനെ മൂന്ന് ഗോളിന് മുട്ടുകുത്തിച്ച് ബാഴ്സ

മാഡ്രിഡ്: സീസണിലെ ആദ്യ എല്‍ ക്ലാസിക്കോയില്‍ ലോകഫുട്ബോളര്‍ ക്രിസ്റ്റിയാനോ റൊണാള്‍ഡോയും സംഘത്തിനും കനത്ത പരാജയം. സ്പാനിഷ് ലാ ലിഗയില്‍ ഇന്നലെ നടന്ന എല്‍ ക്ലാസിക്കോ പോരാട്ടത്തില്‍ റയല്‍ മാഡ്രിഡിനെ അവരുടെ തട്ടകത്തില്‍ എതിരില്ലാത്ത മൂന്നു ഗോളുകള്‍ക്ക് ബാഴ്സലോണ മുട്ടുകുത്തിച്ചു. ഗോള്‍രഹിതമായ ആദ്യപകുതിക്കു ശേഷം ലൂയിസ് സുവാരസ്, ഇതിഹാസ താരം ലയണല്‍ മെസി, യുവതാരം അലക്സ് വിദാല്‍ എന്നിവരുടെ ഗോളുകളാണ് ബാഴ്സയ്ക്ക് മധുരമേറിയ ക്രിസ്മസ് സമ്മാനം നല്‍കിയത്.

ഒരു ഗോള്‍ നേടുകയും ഒന്നിനു വഴിയൊരുക്കുകയും ചെയ്ത മെസിയായിരുന്നു ഒരിക്കല്‍ക്കൂടി എല്‍ ക്ലാസിക്കോയുടെ താരമായത്. ഇന്നലത്തെ പെനാല്‍റ്റി ഗോളോടെ ഒരു ക്ലബിനു വേണ്ടി ഏറ്റവും കൂടുതല്‍ ഗോള്‍ നേടുന്ന താരമെന്ന റെക്കോഡും മെസി സ്വന്തമാക്കി. ബയേണ്‍ മ്യൂണിക്കിനു വേണ്ടി 1965-1979 വരെയുള്ള സീസണുകളില്‍ ഇതിഹാസ താരം ഗെര്‍ഡ് മുള്ളര്‍ നേടിയ 525 ഗോളുകള്‍ എന്ന റെക്കോഡാണ് പഴങ്കഥയായത്. ബാഴ്സയ്ക്കായി മെസിയുടെ 526-ാം ഗോളായിരുന്നു ഇന്നലത്തേത്. ഇതിനു പുറമേ എല്‍ക്ലാസിക്കോയിലെ ഏറ്റവും മികച്ച സ്കോറര്‍(25 ഗോള്‍) എന്ന റെക്കോഡും മെസി സ്വന്തമാക്കി.

കൂടാതെ ഈ കലണ്ടര്‍ വര്‍ഷം 50 ഗോള്‍ എന്ന മാന്ത്രിക സംഖ്യ തികയ്ക്കുകയും ചെയ്തു. ജയത്തോടെ ലീഗില്‍ തലപ്പത്തുള്ള ബാഴ്സലോണ രണ്ടാം സ്ഥാനക്കാരായ അത്ലറ്റിക്കോ മാഡ്രിഡുമായുള്ള ലീഡ് ഒമ്പത് പോയിന്റും റയാലുമായുള്ള ലീഡ് 14 പോയിന്റാക്കിയും വര്‍ധിപ്പിച്ചിട്ടുണ്ട്.