ഫിഫയുടെ തലപ്പത്ത് ചരിത്രത്തിലാദ്യമായി വനിത

മെക്‌സിക്കോ സിറ്റി: ചരിത്രത്തിലാദ്യമായി ഫിഫയുടെ സെക്രട്ടറി ജനറലായി ഒരു വനിത തെരഞ്ഞെടുക്കപ്പെട്ടു. ഐക്യരാഷ്ട്ര സഭാ നയതന്ത്ര പ്രതിനിധിയായ സെനഗലിന്റെ ഫാത്മ സമൂറയാണ് ഫിഫയുടെ ആദ്യ വനിതാ സെക്രട്ടറി ജനറലായി സ്ഥാനമേല്‍ക്കുക.ലോകഫുട്ബോള്‍ സംഘടനയായ ഫിഫയുടെ അമരത്തേക്ക് ചരിത്രത്തിലാദ്യമായാണ് ഒരു വനിത നിയമിക്കപ്പെടുന്നത്. ഫിഫയെ അഴിമതി മുക്തമാക്കുന്നതിനുള്ള നടപടികളുടെ തുടര്‍ച്ചയായാണ് സമൂറയുടെ നിയമനം.

ഈ സ്ഥാനത്തേക്ക് നിയമിക്കപ്പെടുന്ന യൂറോപ്യനല്ലാത്ത ആദ്യ വ്യക്തിയെന്ന ബഹുമതിയും ഇനി ഫത്മയ്ക്ക സ്വന്തം. മെക്‌സിക്കോ സിറ്റിയില്‍ നടന്ന ഫിഫയുടെ വാര്‍ഷിക കോണ്‍ഗ്രസില്‍ ഫിഫ പ്രസിഡന്റ് ജിയോനി ഇന്‍ഫാന്റിനോയാണ് സമൂറയുടെ നിയമനം പ്രഖ്യാപിച്ചത്. സെനഗലില്‍ നിന്നുള്ള ഫത്മ 54 വയസ്സുകാരിയാണ്.

21 വര്‍ഷമായി ഐക്യരാഷ്ട്രസഭയുടെ ഭാഗമായി ജോലി ചെയ്യുകയാണ്. മഹദ് വ്യക്തിത്വമാണവരെന്ന് ജിയോനി പറഞേു. പുതിയ സ്ഥാനലബ്ധിയില്‍ അതിയായ സന്തോഷം ഉണ്ടെന്നും കഴിവും പരിചയവും ഈ സ്ഥാനത്തിന് വേണ്ടി വിനിയോഗിക്കാന്‍ കഴിയുമെന്നാണ് പ്രതീക്ഷിക്കുന്നതെന്നും സമൂറ അഭിപ്രായപ്പെട്ടു.