ഫിഫ ലോകഫുട്ബോളര്‍ പുരസ്കാരം ക്രിസ്റ്റ്യാനോ റൊണാള്‍ഡോയ്ക്ക്

ലണ്ടന്‍: ഫിഫ ലോകഫുട്ബോളര്‍ പുരസ്കാരം റയല്‍ മാഡ്രിഡിന്‍റെ പോര്‍ച്ചുഗല്‍ താരവും ലോകോത്തര സ്ട്രൈക്കറുമായ ക്രിസ്റ്റ്യാനോ റൊണാള്‍ഡോയും ബാര്‍സിലോണയുടെ നെതര്‍ലന്‍ഡ് താരം ലേക്ക് മാര്‍ട്ടിന്‍സിനും പങ്കിട്ടു. ലയണല്‍ മെസിയെയും നെയ്മറിനെയും പിന്തള്ളിയാണ് ക്രിസ്റ്റ്യാനോയും ലേക്ക് മാര്‍ട്ടിന്‍സിനും ഈ നേട്ടത്തിന് അര്‍ഹരായിരിക്കുന്നത്. സ്പാനിഷ് ക്ലബ്ബ് റയല്‍ മാഡ്രിഡിന് ചാംമ്പ്യന്‍സ് ലീഗ് കിരീടവും ലാലിഗയും നേടിക്കൊടുത്ത പ്രകടനമാണ് ക്രിസ്റ്റ്യാനോയെ വീണ്ടും പുരസ്കാരത്തിന് അര്‍ഹനാക്കിയത്.

മികച്ച പരിശീലകനുള്ള പുരസ്കാരം റയല്‍ മാഡ്രിഡിന്‍റെ സിനദിന്‍ സിദാന്‍ സ്വന്തമാക്കി. ക്രിസ്റ്റ്യാനോ ലോകതാരമായി തെരഞ്ഞെടുക്കപ്പെട്ടപ്പോള്‍ സിദാനു ലഭിച്ച പുരസ്കാരം റയലിന് ഇരട്ടിമധുരമായി. ജൂവന്‍റസിന്‍റെ മസിമിലിയാനോ അല്ലഗ്രി, ചെല്‍സിയുടെ അന്‍റോണിയോ കൊണ്ടേ എന്നിവരും പരിശീലവന്മാരുടെ സാധ്യതാ പട്ടികയിൽ ഇടം നേടിയിരുന്നു. നെതര്‍ലന്‍ഡിന്‍റെ സറീന വീഗ്മനാണ് മികച്ച വനിതാ പരിശീലക.

യുവന്‍റസ് താരം ജിയാന്‍ ല്യൂജി ബുഫണാണ് മികച്ച ഗോള്‍ കീപ്പറായി തെരഞ്ഞെടുക്കപ്പെട്ടത്. റയല്‍ മാഡ്രിഡ് താരം കെയ്ലര്‍ നവാസ്, ബയേണ്‍ മ്യൂണിക് താരം മനുവല്‍ ന്യൂയര്‍ എന്നിവരും ഫിഫയുടെ അന്തിമ പട്ടികയിലുണ്ടായിരുന്നു. പുഷ്കാസ് ഗോള്‍ ഓഫ് ദി ഇയര്‍ പുരസ്കാരം ആഴ്സണല്‍ താരം ഒളീവിയര്‍ ജിറൂഡ് കരസ്ഥമാക്കി. ഇംഗ്ലിഷ് പ്രീമിയര്‍ ലീഗില്‍ ക്രിസ്റ്റല്‍ പാലസിനെതിരെ നേടിയ സ്കോര്‍പിയന്‍ ഗോളിലൂടെയാണ് ഈ പുരസ്കാരം ഒളീവിയര്‍ ജിറൂഡിനെ തേടിയെത്തിയത്.

ഫിഫ ഫാന്‍ പുരസ്കാരം സെല്‍റ്റിക് ആരാധകര്‍ക്കാണ് ലഭിച്ചിരിക്കുന്നത്. ഫ്രാന്‍സിസ് കോന്‍(ടോഗോ) ഫെയര്‍ പ്ലേ പുരസ്കാരത്തിനും ബുഫണ്‍(ഗോളി) ബൊനൂച്ചി, ആല്‍വസ്, സെര്‍ജിയോ റാമോസ്, മാര്‍സെലോ(കാവല്‍നിര), ലൂക്ക മോഡ്രിച്ച്‌, ടോണി ക്രൂസ്, ആന്ദ്രെ ഇനിയേസ്റ്റ(മധ്യനിര), മെസ്സി, നെയ്മര്‍, ക്രിസ്റ്റ്യാനോ (മുന്നേറ്റനിര) എന്നിവര്‍ ഫിഫ ഫിഫ്പ്രോ ലോക ഇലവന്‍ പുരസ്കാരത്തിനും അര്‍ഹരായി.

Fifa footballer of the year award wins by Cristiano Ronaldo

Cristiano Ronaldo wins Best FIFA Men's Player Award 2017