​ക്യാൻസറിനോട് പൊരുതി യാന നൊവോട്‍ന വിട വാങ്ങി

പ്രാഗ്: ക്യാൻസറിനോട് പൊരുതി ഒടുവിൽ മുൻ വിംബിൾഡൺ ചാമ്പ്യൻ യാന നൊവോട്‍ന വിട വാങ്ങി. തിങ്കളാഴ്ചയാണ് 49ാം വയസ്സിൽ ചെക് റിപ്പബ്ലിക് താരം ലോകത്തോട് വിട പറഞ്ഞത്. 1998-ല്‍ ഫ്രഞ്ചുകാരി നതാലി തൗസിയത്തിനെ തോൽപ്പിച്ചാണ് നൊവോട്‍ന വിംബിൾഡൺ കിരീടം നേടിയത്.

1993ൽ സ്റ്റെഫി ഗ്രാഫിനോടും 97ൽ മാർട്ടിന ഹിഞ്ചിസിനോടും അവർ വിംബിൾഡൺ ഫൈനലുകളിൽ പരാജയപ്പെട്ടിരുന്നു. 1993ല്‍ അവിശ്വസനീയമായി സ്റ്റെഫിയോട് പരാജയപ്പെട്ടതിന് ശേഷം കരച്ചിലടക്കാൻ പാടു പെട്ട നൊവോട്‍നയെ ടെന്നീസ് ലോകത്തിന് മറക്കാനാവില്ല.

അന്ന് മത്സരശേഷം പൊട്ടിക്കരഞ്ഞ താരത്തെ കെന്റ് രാജകുമാരി ആശ്വസിപ്പിച്ചത് വിംബിള്‍ഡണിലെ അവിസ്മരണീയ കാഴ്ചകളിലൊന്നാണ്.