ഇംഗ്ലീഷ് ഫുട്‍ബോള‍ർ ഫ്രാങ്ക് ലംപാ‍ർഡ് ഇനി പുതിയ റോളിൽ

ലണ്ടൻ: മുൻ ഇംഗ്ലീഷ് മിഡ് ഫീൽഡർ ഫ്രാങ്ക് ലംപാ‍ർഡ് ടീം മാനേജരാവുന്നു. ഇംഗ്ലണ്ടിലെ രണ്ടാം ഡിവിഷൻ ക്ലബ്ബായ ഡെർബി കൗണ്ടിയുമായാണ് മുൻ ചെൽസി താരം കൂടിയായ ലംപാർഡ് കരാർ ഒപ്പിട്ടിരിക്കുന്നത്. മൂന്ന് വർഷത്തേക്കാണ് കരാർ.

മൂന്ന് തവണ ചെൽസി പ്രീമിയർ ലീഗ് കിരീടം നേടിയപ്പോൾ ടീം അംഗമായിരുന്നു ലംപാ‍ർഡ്. 2016ലാണ് 39കാരനായ താരം ഫുട്ബോളിൽ നിന്ന് വിരമിച്ചത്. വിരമിച്ച് രണ്ട് വർഷത്തിന് ശേഷമാണ് അദ്ദേഹം പുതിയ റോളിലെത്തുന്നത്.

"ആദ്യമായാണ് ഒരു ടീമിൻെറ മാനേജരായി പ്രവർത്തിക്കാൻ ഒരുങ്ങുന്നത്. ഇത് എളുപ്പമുള്ള ജോലിയല്ല എന്നെനിക്കറിയാം. എങ്കിലും തികഞ്ഞ ആത്മവിശ്വാസത്തിലാണ്," ലംപാർഡ് പറഞ്ഞു.