ശിരോവസ്ത്രം നിര്‍ബന്ധം: മത്സരത്തില്‍ നിന്ന് ഇന്ത്യന്‍ താരം പിന്മാറി

പൂനെ: ഇറാനില്‍ നടക്കുന്ന ഏഷ്യന്‍ ടീം ചെസ് ചാമ്പ്യന്‍ഷിപ്പില്‍ വനിത താരങ്ങള്‍ക്ക് ശിരോവസ്‍ത്രം നിര്‍ബന്ധമാക്കിയ നടപടിയില്‍ പ്രതിഷേധിച്ച് ഇന്ത്യന്‍ ഗ്രാന്‍മാസ്റ്റര്‍ സൗമ്യ സ്വാമിനാഥന്‍ പിന്മാറി. മൗലിക അവകാശങ്ങളുടെ ലംഘനമാണെന്ന് ചൂണ്ടിക്കാണിച്ചാണ് സൗമ്യ ഹമദാന്‍ നഗരത്തില്‍ നടക്കുന്ന മത്സരത്തില്‍ നിന്ന് പിന്മാറിയത്. ഇസ്ലാമിക രാഷ്ട്രമായ ഇറാനില്‍ സ്ത്രീകള്‍ക്ക് ശിരോവസ്ത്രം നിര്‍ബന്ധമാണ്.

ജൂലൈ 26 മുതല്‍ ഓഗസ്റ്റ് നാല് വരെയാണ് ഏഷ്യന്‍ ടീം ചെസ് ചാമ്പ്യന്‍ഷിപ്പ്. ഫേസ്‍ബുക്കിലൂടെയാണ് സൗമ്യ, നിലപാട് അറിയിച്ചത്.

"ശിരോവസ്ത്രമോ ബുര്‍ഖയോ ധരിക്കാന്‍ നിര്‍ബന്ധിക്കപ്പെടുന്നത് ഞാന്‍ ഇഷ്‍ട്ടപ്പെടുന്നില്ല. എന്‍റെ മൗലിക അവകാശം റദ്ദ് ചെയ്യുന്ന തരത്തിലുള്ള നിയമമാണിത്. എന്‍റെ ആവിഷ്‍കാര സ്വാതന്ത്ര്യത്തിന്‍റെയും സ്വതന്ത്ര ചിന്തയുടെയും മനസാക്ഷിയുടെയും മതവിശ്വാസത്തിന്‍റെയും പ്രശനമാണിത്. എന്‍റെ അവകാശങ്ങള്‍ ഉറപ്പാക്കാന്‍ നിലവില്‍ എനിക്കുള്ള ഒരേയൊരു വഴി ഇറാനില്‍ പോകാതിരിക്കുക എന്നതാണ്." 29 വയസുകാരിയായ സൗമ്യ സോഷ്യല്‍ മീഡിയ അക്കൗണ്ടില്‍ എഴുതി.

ആദ്യമായല്ല വനിത കായിക താരങ്ങള്‍ ഇറാന്‍ ബഹിഷ്‍കരിക്കുന്നത്. ഇന്ത്യന്‍ ഷൂട്ടിങ് താരം ഹീന സിദ്ധു 2016ല്‍ ഇറാനില്‍ നടന്ന ഏഷ്യന്‍ എയര്‍ഗണ്‍ മീറ്റില്‍ പങ്കെടുക്കാതിരുന്നത് ഇതേ കാരണം കൊണ്ടാണ്. 2017ല്‍ അമേരിക്കന്‍ ചെസ് താരം നസീ പൈകിസീ ഇറാനില്‍ മത്സരിച്ചിരുന്നില്ല.

"കായികതാരങ്ങളുടെ അവകാശങ്ങള്‍ക്കും ക്ഷേമത്തിനും സംഘാടകര്‍ വളരെ ചെറിയ പ്രധാന്യം മാത്രം കല്‍പ്പിക്കുന്നത് നിരാശയുണ്ടാക്കുന്നു" അവര്‍ പറഞ്ഞു.