ഒളിമ്പിക്സ് ഗുഡ്‍വിൽ അംബാസ്സിഡറാവാൻ സച്ചിന് ക്ഷണം

ഒളിമ്പിക്സ് ഗുഡ്‍വിൽ അംബാസ്സിഡറാവാൻ സച്ചിനെ സമീപിച്ച് ഇന്ത്യൻ ഒളിമ്പിക്സ് അസോസിയേഷൻ. നേരത്തെ ചലച്ചിത്രതാരം സല്‍മാന്‍ ഖാനെയാണ് തെരഞ്ഞെടുത്തതെങ്കിലും വിപുലമായ എതിര്‍പ്പിനെത്തുടർന്നാണ് സച്ചിനെ സമീപിച്ചിരിക്കുന്നത്. സൽമാനെ നിയമിച്ചതു പോലെ രഹസ്യമായല്ല, പരസ്യമായിത്തന്നെയാണ് ഇക്കുറി അധികാരികള്‍ സച്ചിന് കത്തെഴുതിയിരിക്കുന്നത്. ഒളിമ്പിക്സ് മെഡല്‍ ജേതാക്കളും ഇക്കുറി റിയോ ഒളിമ്പിക്സിൽ പങ്കെടുക്കാൻ യോഗ്യത നേടിയവരുമായ ഒളിമ്പ്യന്മാരുടെ സാന്നിദ്ധ്യത്തിലാണ് കത്ത് തയ്യാറാക്കിയത്. ബോക്സറായ മേരി കോം, ഹോക്കി ക്യാപ്റ്റൻ സർദർ സിങ്, ഷൂട്ടർ അപൂ‍ർവി ചന്ദേല എന്നിവർ സാക്ഷികളായി.

സൽമാൻഖാനെ ഗുഡ്‍വിൽ അംബാസ്സിഡർ ആക്കിയതിനെതിരെ മിൽഖാ സിങ് അടക്കമുള്ളവര്‍ രംഗത്തെത്തിയിരുന്നു. സ്പോര്‍ട്സിന്‍റെ യാതൊരു പശ്ചാത്തലവുമില്ലാത്തവരെ ഒളിമ്പിക്സിന്‍റെ ഗുഡ്‍വില്‍ അംബാസ്സിഡറാക്കരുത് എന്ന് പരക്കെ എതിര്‍പ്പുകളും ഉയര്‍ന്നിരുന്നു.

സല്‍മാനെ തഴഞ്ഞ് പകരം സച്ചിനെ കൊണ്ടുവരാനാണോ അതോ ഇരുവരേയും ഒരുമിപ്പിച്ച് ഇത് മുന്നോട്ടു കൊണ്ടു പോകുമോ എന്നുള്ള കാര്യങ്ങളില്‍ അവ്യക്തത തുടരുകയാണ്.