ബ്ലാസ്റ്റേഴ്സിന്‍റെ ഹൃദയം തകർത്ത് കോപ്പാലാശാന്‍

കളിയുടെ ആദ്യ മിനിറ്റിൽ തന്നെ ബ്ലാസ്റ്റേഴ്സിന്‍റെ ഹൃദയം തകർന്നു. മൽസരം തുടങ്ങി 23–ാം സെക്കൻഡിൽ പത്തൊൻപതു വയസ്സുകാരൻ ജെറി നേടിയ ഗോളിലാണ് ജംഷഡ്പുർ മുന്നിൽ കയറിയത്. ബ്ലാസ്റ്റേഴ്സ് താരങ്ങൾ നിലയുറപ്പിക്കും മുൻപേ ആയിരുന്നു ജംഷഡ്പുരിന്റെ ഗോൾ. പിന്നാലെ 32-ാം മിനിറ്റിൽ അടുത്ത ഗോളും ബ്ലാസ്റ്റേഴ്സിന്‍റെ മുൻ പരിശീലകൻ പരിശീലിപ്പിക്കുന്ന ജംഷഡ്പൂർ നേടി. സ്കോർ 2–0. ഐഎസ്എല്ലിൽ തുടർച്ചയായ മൂന്നാം ജയം തേടി ജംഷഡ്പുർ എഫ്സിയെ നേരിടുകയാണ് കേരളാ ബ്ലാസ്റ്റേഴ്സ്.

ഇന്ന് ജയിച്ചാൽ മുംബൈ സിറ്റി എഫ്സി, പുണെ സിറ്റി എഫ്സി, എഫ്സി ഗോവ എന്നീ ടീമുകളെ മറികടന്ന് ബ്ലാസ്റ്റേഴ്സിന് മൂന്നാം സ്ഥാനത്തേക്ക് കയറാം. നിലവിൽ 10 മൽസരങ്ങളിൽനിന്ന് 14 പോയിന്റുമായി ആറാം സ്ഥാനത്താണ് ബ്ലാസ്റ്റേഴ്സ്. ഇരു ടീമുകളും തമ്മിൽ കൊച്ചിയിൽ നടന്ന ആദ്യപാദ മൽസരം സമനിലയിൽ അവസാനിച്ചിരുന്നു.

അതേസമയം, സീസണിലാകെ രണ്ടു തവണ മാത്രം വിജയിച്ച ജംഷഡ്പുരിന് സ്വന്തം ഗ്രൗണ്ടില്‍ ഇതുവരെ ഒരു ജയം പോലും നേടാനായിട്ടില്ല. ഒൻപതു മൽസരങ്ങളിൽനിന്ന് 10 പോയിന്റുമായി പോയിന്റ് പട്ടികയിൽ എട്ടാം സ്ഥാനത്താണ് ബ്ലാസ്റ്റേഴ്സിന്റെ മുൻ പരിശീലകൻ കൂടിയായ സ്റ്റീവ് കോപ്പലിന്റെ കീഴിലിറങ്ങുന്ന ജംഷഡ്പുർ എഫ്സി.