പിതാവിൻെറ പീഡനം വെളിപ്പെടുത്തി മുൻ വിംബിൾഡൺ താരം

സിഡ‍്‍നി: പിതാവിൻെറ ക്രൂര പീഡനങ്ങളെ കുറിച്ച് വെളിപ്പെടുത്തലുകളുമായി മുൻ വിംബിൾഡൺ സെമി ഫൈനലിസ്റ്റ് ജെലീന ഡോക്കിച്ച്. ശാരീരികമായും മാനസികമായും പിതാവ് ക്രൂരമായി ഉപദ്രവിക്കാറുണ്ടെന്ന് തൻെറ ആത്മകഥയിലാണ് ടെന്നീസ് താരം വെളിപ്പെടുത്തിയിരിക്കുന്നത്.

ജെലീനയുടെ കോച്ച് കൂടിയായിരുന്നു പിതാവ് ഡാമിർ ഡോക്കിച്ച്. "എല്ലാ ദിവസവും അയാൾ എന്നെ ഉപദ്രവിക്കുമായിരുന്നു. ചിലപ്പോൾ നിർത്താതെ തല്ലും. തലമുടിയും ചെവിയും പിടിച്ച് വലിക്കും. ചവിട്ടി താഴെയിടുകയും മുഖത്ത് തുപ്പുകയും ചെയ്യുമായിരുന്നു." ആത്മകഥയിൽ ജെലീന എഴുതുന്നു.

"ടെന്നീസ് കളിച്ച് തുടങ്ങിയ കാലം മുതൽ ഉപദ്രവം തുടങ്ങിയിരുന്നു. അതിന് പ്രത്യേകിച്ച് കാരണമൊന്നും വേണ്ട. ചിലപ്പോൾ നിയന്ത്രണം വിട്ട് അയാൾ അക്രമാസക്തനാവുമായിരുന്നു." മുൻ ലോക നാലാം നമ്പർ താരം പറയുന്നു. ആത്മകഥയിൽ നിന്നുള്ള ചില ഭാഗങ്ങൾ ഒാസീസ് മാധ്യമങ്ങൾ പുറത്ത് വിട്ടു.

വരുന്ന ആഴ്ചയാണ് പുസ്തകം പ്രസിദ്ധീകരിക്കാൻ പോവുന്നത്. വെളിപ്പെടുത്തലുകൾ നടത്താൻ ധൈര്യം കാണിച്ച ജെലീനയെ അഭിനന്ദിച്ച് നിരവധി പേർ രംഗത്തെത്തിയിട്ടുണ്ട്.