ക്രിക്കറ്റ് ഏകദിനം: കൊച്ചിയിൽ വേണ്ടെന്ന് ബ്ലാസ്റ്റേഴ്‌സ്

കൊച്ചി: ഇന്ത്യ- വെസ്റ്റിൻഡീസ്‌ ഏകദിന ക്രിക്കറ്റ് മത്സരം കൊച്ചിയിൽ നടത്തുന്നതിൽ ബ്ലാസ്റ്റേഴ്‌സിന് അതൃപ്തി. കൊച്ചിയിലെ ഫിഫ അംഗീകൃത ടർഫ് ഫുടബോൾ മത്സരങ്ങൾക്ക് മാത്രമേ ഉപയോഗിക്കാൻ പാടുള്ളൂ എന്ന് സച്ചിൻ ടെന്‍ഡുല്‍ക്കർ ഇന്നലെ പറഞ്ഞിരുന്നു. ഇന്ന് രാവിലെ ജിസിഡിഎയും ബ്ലാസ്റ്റേഴ്‍സ് പ്രതിനിധികളും കെസിഎയും ചേർന്ന് നടത്തിയ യോഗത്തിൽ ബ്ലാസ്റ്റേഴ്‌സിന് ഗ്രൗണ്ടിൽ ക്രിക്കറ്റ് നടത്തുന്നതിൽ എതിർപ്പില്ലെന്ന് അറിയിച്ചതായി വാർത്ത ബിവന്നിരുന്നു. എന്നാൽ, അത് തെറ്റാണെന്ന് ടീം അധികൃതർ അറിയിച്ചു. ഇക്കാരണത്താൽ, ഹോം മത്സരങ്ങൾ വൈകുന്നതിലും ബ്ലാസ്റ്റേഴ്‌സ് അതൃപ്തി അറിയിച്ചു.

ക്രിക്കറ്റ് മത്സരം നടന്നാല്‍ ബ്ലാസ്റ്റേഴ്‍സിന്‍റെ ഹോംമാച്ചുകള്‍ മാറ്റി വെക്കേണ്ടി വരും. കഴിഞ്ഞ തവണത്തെ പോലെയല്ല ഇത്തവണ സീസണ്‍ നേരത്തെ ആരംഭിക്കും. ഐഎസ്എല്‍ മത്സരങ്ങള്‍ ക്രിക്കറ്റിന് വേണ്ടി മാറ്റിവെച്ചാല്‍ മാച്ച് ഷെഡ്യൂളില്‍ വലിയ മാറ്റങ്ങള്‍ വരുത്തേണ്ടി വരുമെന്നും ബ്ലാസ്റ്റേഴ്സ് അറിയിച്ചു. അത് അംഗീകരിക്കാനാകില്ല. കേരള ബ്ലാസ്റ്റേഴ്‍സിന്‍റെ ഹോം ഗ്രൗണ്ട് കൂടിയായ കലൂർ സ്റ്റേഡിയത്തിൽ ക്രിക്കറ്റ് നടത്തരുതെന്ന് സി.കെ.വിനീതും ഇയാൻ ഹ്യൂമും പറഞ്ഞിരുന്നു.