സിദാന്‍റെ മുഖം മൂടികളുമായി മറ്റെരാസിക്കെതിരെ ബ്ലാസ്റ്റേഴ്സ് ഫാൻസ്

കൊച്ചി: കലൂർ ജവഹർലാൽ നെഹ്റു സ്റ്റേ‍ഡിയത്തിൽ നടക്കുന്ന കേരള ബ്ലാസ്‌റ്റേഴ്‌സ്-ചെന്നൈയിന്‍ എഫ്‌സി മത്സരത്തില്‍ ബ്ലാസ്റ്റേഴ്‌സ് ആരാധകര്‍ സിനദീന്‍ സിദാന്റെ മുഖംമൂടി അണിഞ്ഞ് പ്രതിഷേധിച്ചു എതിരാളികളായ ചെന്നൈയിൻ എഫ്സി പരിശീലകൻ മാർകോ മറ്റെരാസിക്കെതിരെയാണ് ഇത്തരത്തിൽ പ്രതിഷേധിച്ചത്. ബ്ലാസ്റ്റേഴ്സിന്റെ ചെന്നൈയില്‍ നടന്ന ആദ്യ പാദ മത്സരത്തില്‍ മറ്റരാസിയുടെ ചില പ്രകോപനപരമായ പെരുമാറ്റമാണ് കേരള ആരാധകരെ ചൊടിപ്പിച്ചത്. മത്സരശേഷം ഹസ്തദാനം നല്‍കാനെത്തിയ ബ്ലാസ്റ്റേഴ്സ് താരങ്ങളെ മറ്റരാസി പിടിച്ചു തള്ളിയിരുന്നു.

എന്നാൽ ഇതിനെതിരെ മറ്റെരാസിയുടെ മറുപടി ഇങ്ങനെയായിരുന്നു. അത്രയും പണം അവര്‍ ഇതിന് ചെലവാക്കുന്നുണ്ടോ. താനാണെങ്കില്‍ ഭക്ഷണം കഴിക്കാനും മറ്റെന്തിനെങ്കിലുമായിരുന്നു ഇത്രയും പണം ചെലവാക്കുകയെന്നും മറ്റെരാസി പറഞ്ഞു.

കഴിഞ്ഞുപോയ മത്സരങ്ങളിലെ തിരിച്ചടികളിലല്ല, അടുത്ത മത്സരത്തിലെ പ്രകടനത്തിലാണ് ടീമിന്റെ ശ്രദ്ധ. പോയിന്റ് പട്ടികയിലെ സ്ഥാനം ഇപ്പോള്‍ ശ്രദ്ധിക്കുന്നില്ല. കഴിഞ്ഞ സീസണില്‍ ഈ ഘട്ടത്തില്‍ ഏറ്റവും പിന്നിലായിരുന്നു. ഇക്കുറി ഏഴാമതാണ്. ഇനിയും തിരിച്ച് വരാന്‍ സാധിക്കുമെന്നും അദ്ദേഹം പറഞ്ഞു.

മലപ്പുറത്തെയും കോഴിക്കോട്ടെയും ബ്ലാസ്‌റ്റേഴ്‌സിന്റെ ആരാധകരാണ് സിദാന്റെ മുഖംമൂടികള്‍ തയ്യാറാക്കിയത്. സ്റ്റേഡിയത്തിന് പുറത്ത് 35000 മുഖംമൂടികള്‍ വിതരണം ചെയ്തു. സിദാന്റെ മാസ്‌ക് റെഡി എന്ന ക്യാംപെയ്ന്‍ സോഷ്യല്‍മീഡിയയിലും സജീവമാണ്. 2006ലെ ഇറ്റലി-ഫ്രാന്‍സ് ലോകകപ്പ് ഫൈനലിനിടെയാണ് സിനദീന്‍ സിദാന്റെ ഹെഡ്ബട്ട് കൊണ്ട് മറ്റെരാസി നിലത്ത് വീഴുന്നതും, വലിയ വിവാദങ്ങളുണ്ടായതും.