കേരള ബ്ലാസ്റ്റേഴ്സിന് നാല് പുതിയ ഉടമകൾ കൂടി

കേരളാ ബ്ലാസ്റ്റേഴ്സ് ടീമിന് നാല് പുതിയ ഉടമകള്‍ കൂടി. നിലവില്‍ ഉടമയായ സച്ചിന്‍ തെന്‍ഡുല്‍ക്കര്‍ക്കൊപ്പം തെലുങ്ക് സൂപ്പര്‍താരങ്ങളായ ചിരഞ്ജീവിയും നാഗാര്‍ജുനയും അല്ലു അര്‍ജുനും വ്യവസായിയായ അരവിന്ദ് പ്രസാദും കേരളത്തിന്റെ അഭിമാനമായി ബ്ലാസ്റ്റേഴ്സ് ടീമില്‍ നിക്ഷേപം നടത്തും. ഇവരില്‍ അല്ലു അര്‍ജുന്‍ ഒഴികെ നാലുപേരും മുഖ്യമന്ത്രി പിണറായി വിജയനെ സന്ദര്‍ശിച്ചു. കായിക മന്ത്രി ഇ.പി.ജയരാജനും സച്ചിന്റെ ഭാര്യ അഞ്ജലിയും കൂടിക്കാഴ്ചയില്‍ സംബന്ധിച്ചു.

അതേസമയം, സംസ്ഥാനത്തിന്റെ ഫുട്ബോള്‍ വികസനത്തിനുവേണ്ടിയുള്ള സമഗ്രമായ പദ്ധതിക്കാണ് ഇവര്‍ രൂപം നല്‍കിയിട്ടുള്ളതെന്ന്് മുഖ്യമന്ത്രി പിണറായി വിജയന്‍ വാര്‍ത്താസമ്മേളനത്തില്‍ അറിയിച്ചു. ഇളംപ്രായത്തില്‍ തന്നെ ഫുട്ബോള്‍ പ്രതിനിധികളെ കണ്ടെത്താനുള്ള ശ്രമത്തിനു പിന്തുണ നല്‍കുമെന്നും ഇവര്‍ വ്യക്തമാക്കിയിട്ടുണ്ട്. ഇതിന്റെ ഭാഗമായി ഒരു റസിഡന്‍ഷ്യല്‍ ഫുട്ബോള്‍ അക്കാദമി സര്‍ക്കാരിന്റെ നിര്‍ദേശം അനുസരിച്ച്‌ ഇവര്‍ തുടങ്ങുമെന്നും മുഖ്യമന്ത്രി പറഞ്ഞു.

രണ്ടു വര്‍ഷം മുന്‍പ് ഇന്ത്യന്‍ സൂപ്പര്‍ ലീഗ് തുടങ്ങിയപ്പോള്‍ കൊച്ചി ടീമിനെ സ്വന്തമാക്കിയതു ഹൈദരാബാദ് ആസ്ഥാനമായ പിവിപി വെന്‍ച്വേഴ്സ് ആയിരുന്നു. സച്ചിന്‍ സഹ ഉടമകളിലൊരാളായാണ് എത്തിയത്. എന്നാല്‍, സാമ്ബത്തികപ്രതിസന്ധികളെത്തുടര്‍ന്നു പിവിപി ഗ്രൂപ്പ് കഴിഞ്ഞ വര്‍ഷം പിന്മാറിയപ്പോള്‍ സിനിമാ നിര്‍മാതാക്കള്‍ കൂടിയായ ആര്‍.എല്‍.വി. പ്രസാദ് നിക്ഷേപവുമായി എത്തി. കേരളത്തില്‍ നിന്നു മുത്തൂറ്റ് ഗ്രൂപ്പും ടീമില്‍ പണം മുടക്കി. എന്നാല്‍, മികച്ച താരങ്ങളില്ലാത്തതിനാല്‍ ആദ്യവര്‍ഷത്തെപ്പോലെ തിളങ്ങാന്‍ ടീമിനു കഴിഞ്ഞില്ല. ഈ സാഹചര്യത്തിലാണു കൂടുതല്‍ നിക്ഷേപകരെ ഉള്‍പ്പെടുത്തി ടീമിനെ മികവുറ്റതാക്കാന്‍ സച്ചിന്റെ നേതൃത്വത്തില്‍ ശ്രമം തുടങ്ങിയത്.