ഹ്യൂമേട്ടന്‍റെ ഹാട്രിക് മികവില്‍ കേരളാ ബ്ലാസ്റ്റേഴ്‍സിന് കിടിലന്‍ ജയം

ഹ്യൂമേട്ടന്‍റെ ഹാട്രിക് മികവില്‍ വിജയകിരീടം ചൂടി കേരളാ ബ്ലാസ്റ്റേഴ്‍സ്. ഡല്‍ഹി ഡൈനാമോസിനെയാണ് കേരളാ ബ്ലാസ്റ്റേഴ്‍‍സ് നിഷ്പ്രഭമാക്കിയത്. മലയാളികളുടെ സ്വന്തം ഇയാന്‍ ഹ്യൂമെന്ന ഹ്യൂമേട്ടന്‍റെ ഹാട്രിക് മികവാണ് കേരളാ ബ്ലാസ്റ്റേഴ്‍സിന് കരുത്തായത്. തുടര്‍ച്ചയായ സമനിലകളിലൂടെ നിരാശ മാത്രമേ ഇതുവരെ ബ്ലാസ്റ്റേഴ്സ് സമ്മാനിച്ചിരുന്നുള്ളൂ. എന്നാൽ ബ്ലാസ്റ്റേഴ്സ് ആരാധകരുടെ ഈ കടുത്ത നിരാശയെ നിഷ്പ്രഭമാക്കിക്കൊണ്ടാണ് കൊമ്പന്‍മാര്‍ ഈ സീസണിലെ ഏറ്റവും ഗംഭീര വിജയം സ്വന്തമാക്കിയത്.

ഒന്നിനെതിരെ മൂന്നു ഗോളുകൾക്കാണ് ബ്ലാസ്റ്റേഴ്‍സ് മിന്നുന്ന വിജയത്തിനുടമകളായത്. ഹ്യൂം ഗോളടിക്കുന്നില്ലെന്ന വ്യാപക പരാതിയ്ക്കുള്ള ചുട്ട മറുപടിയെന്നോണം ഈക്കളിയിൽ ഹ്യൂം ഗോള്‍മഴ പെയ്യിക്കുകയായിരുന്നു. ഡല്‍ഹിയിലും ബ്ലാസ്റ്റേഴ്‍സ് സമനില വഴങ്ങുമെന്ന് കരുതിയ ആരാധകരെ ഹ്യൂമിന്‍റെ ഗോൾമഴ ആവേശത്തിൽ ആറാടിക്കുകയായിരുന്നു.