സന്തോഷ് ട്രോഫി താരങ്ങള്‍ക്ക് 2 ലക്ഷം രൂപ വീതം പാരിതോഷികം

തിരുവനന്തപുരം: പതിനാല് വര്‍ഷത്തിന് ശേഷം സന്തോഷ് ട്രോഫി തിരിച്ചുപിടിച്ച കേരളത്തിന്റെ മിന്നും താരങ്ങള്‍ക്ക് സര്‍ക്കാരിന്റെ അംഗീകാരം. എല്ലാ താരങ്ങള്‍ക്കും രണ്ട് ലക്ഷം രൂപം വീതം പാരിതോഷികം സര്‍ക്കാര്‍ പ്രഖ്യാപിച്ചു. ടീമിലുണ്ടായിരുന്ന 11പേര്‍ക്ക് സര്‍ക്കാര്‍ ജോലി നല്‍കാനും മുന്നേറ്റ താരം കെ.പരി രാഹുലിന് സര്‍ക്കാര്‍ വീട് വച്ച്‌ നല്‍കാനും മന്ത്രി സഭ തീരുമാനിച്ചു.

ഇതുകൂടാതെ ദേശീയ സീനിയര്‍ വോളിബാള്‍ ചാമ്പ്യന്‍ഷിപ്പില്‍ കിരീടം നേടിത്തന്ന കേരളത്തിന്റെ താരങ്ങള്‍ക്കും സര്‍ക്കാര്‍ പാരിതോഷികം പ്രഖ്യാപിച്ചു. ടീമില്‍ അംഗങ്ങള്‍ക്ക് 1.5 ലക്ഷം രൂപ പാരിതോഷികം നല്‍കാനാണ് സര്‍ക്കാര്‍ തീരുമാനം. ദേശീയ സീനിയര്‍ വോളി മത്സരത്തില്‍ കരുത്തരായ റെയില്‍വേസിനെ പരാജയപ്പെടുത്തിയാണ് കേരളം കിരീടം നേടിയത്.

ഏപ്രില്‍ ആറിന് കേരളത്തിലുടനീളം വിജയദിനമായി ആഘോഷിക്കാന്‍ സംസ്ഥാന സര്‍ക്കാര്‍ തീരുമാനിച്ചിട്ടുണ്ട്. അതേ ദിവസം സംസ്ഥാന സര്‍ക്കാറിന്റെ ആഭിമുഖ്യത്തില്‍ കേരളാ ടീമിന് സ്വീകരണം നല്‍കും. വൈകുന്നേരം നാല് മണിക്ക് തിരുവനന്തപുരം സെന്‍ട്രല്‍ സ്റ്റേഡിയത്തിലാണ് സ്വീകരണം. പശ്ചിമ ബംഗാളിനെ പരാജയപ്പെടുത്തിയാണ് കേരള ടീം സന്തോഷ് ട്രോഫി കിരീടം സ്വന്തമാക്കിയത്.