അവസാന മിനിറ്റിലെ ഗോളിൽ മാഞ്ചസ്റ്ററിന് സമനില

ലൈസസ്റ്റർ: ഇംഗ്ലീഷ് പ്രീമിയർ ലീഗിൽ മാഞ്ചസ്റ്റർ യുണൈറ്റഡിന് തിരിച്ചടി. ശനിയാഴ്ച ലൈസസ്റ്റർ സിറ്റിക്കെതിരായി നടന്ന മത്സരത്തിൽ അവർ 2-2ന് സമനില വഴങ്ങി. ഇതോടെ ലീഗിൽ രണ്ടാം സ്ഥാനത്തുള്ള യുണൈറ്റഡ് ഒന്നാം സ്ഥാനത്തുള്ള മാഞ്ചസ്റ്റർ സിറ്റിയേക്കാൾ ഏറെ പിന്നിലാണ്.

മത്സരത്തിൻെറ അവസാന മിനിറ്റിൽ വീണ ഗോളിലാണ് യുണൈറ്റഡ് സമനില വഴങ്ങിയത്. 27ാം മിനിറ്റിൽ ജാമി വാർദിയിലൂടെ ലൈസസ്റ്റർ ആണ് ആദ്യം മുന്നിലെത്തിയത്. 40ാം മിനിറ്റിലും 60ാം മിനിറ്റിലും ഹുവാൻ മാറ്റ ലൈസസ്റ്റർ സിറ്റിയുടെ വല ചലിപ്പിച്ചു. വിജയമുറപ്പിച്ച യുണൈറ്റഡിന് പക്ഷേ 94ാം മിനിറ്റിൽ ഹാരി മഗ്യൂറേ നേടിയ ഗോൾ ഇരുട്ടടിയായി.