കോപ്പ അമേരിക്ക: വെനസ്വേലയെ തകര്‍ത്ത് അര്‍ജന്റീന സെമിയില്‍

മാസച്യൂസിറ്റ്‌സ്: വെനസ്വേലയെ ഒന്നിനെതിരെ നാലു ഗോളുകള്‍ക്ക് തകര്‍ത്ത് അര്‍ജന്റീന കോപ്പ അമേരിക്ക സെമി ഫൈനലില്‍ കടന്നു. മല്‍സരത്തിന്റെ ഇരുപകുതികളിലുമായിട്ടായിരുന്നു അര്‍ജന്റീനയുടെ ഗോളുകള്‍.

കളിയുടെ തുടക്കം മുതല്‍ മെസ്സിയും ഹിഗ്വയ്‌നും നിരവധി മുന്നേറ്റങ്ങൾ നടത്തിയിരുന്നു. തുടർന്ന് മെസ്സി മറിച്ചു നൽകിയ പാസ്സിൽ എട്ടാം മിനിറ്റിലായിരുന്നു ഹിഗ്വയ്‌ന്‍റെ ആദ്യ ഗോൾ. 28 ാമത്തെ മിനിറ്റിൽ രണ്ടാമത്തെ ഗോളും ഹിഗ്വയ്നിയുടേതായിരുന്നു. പിന്നീട് വെനസ്വേല മികച്ച ഷോട്ടുകൾ ഉതിർത്തെങ്കിലും സെർ‍ജിയോ റൊമേറോയുടെ സേവുകൾ അർജന്‍റീനെയെ തുണച്ചു.

60 ാം മിനിറ്റിലാണ് മെസ്സിയുടെ ഗോള്‍ പിറന്നത്. രാജ്യത്തിനുവണ്ടി മെസ്സി നേടുന്ന 54 ാമത്തെ ഗോളായിരുന്നു അത്. ഇതോടെ രാജ്യത്തിനുവേണ്ടി ഏറ്റവും കൂടുതല്‍ ഗോള്‍ നേടിയ ഗബ്രിയേല്‍ ബാറ്റിസ്റ്റിയൂട്ടയുടെ റെക്കോര്‍ഡിനൊപ്പം മെസ്സിയും എത്തി.

വെനിസ്വേലയുടെ ആശ്വാസഗോള്‍ 70 ാമത്തെ മിനിറ്റിലായിരുന്നു. എന്നാല്‍ ഒരു മിനിറ്റിനുള്ളില്‍ എറിക് ലാമെല പന്ത് വലയിലെത്തിച്ച് അര്‍ജന്റീനയുടെ ഗോൾ പട്ടിക പൂർത്തിയാക്കി.

സെമിഫൈനല്‍ പോരാട്ടത്തില്‍ ആതിഥേയരായ അമേരിക്കയാണ് അര്‍ജന്റീനയുടെ എതിരാളി.

ചിത്രങ്ങൾ: എ.പി