വിശ്വനാഥൻ ആനന്ദിനെ സമനിലയിൽ തളച്ച് പതിനാലുകാരൻ നിഹാൽ

കൊച്ചി: ചെസ് രാജാവ് വിശ്വനാഥൻ ആനന്ദിനെ സമനിലയിൽ തളച്ച് പതിനാലുകാരനായ സൂപ്പര്‍ താരം നിഹാൽ സരിൻ. കൊൽക്കത്തയിൽ നടക്കുന്ന ടാറ്റാ സ്റ്റീൽ രാജ്യാന്തര റാപിഡ് ചെസ് മത്സരത്തിന്‍റെ എട്ടാം റൗണ്ടിലാണ് നിഹാൽ വിശ്വനാഥൻ ആനന്ദിനെ സമനിലയിൽ തളച്ചത്.

റാപിഡ് ചെസ് മുൻ ലോകചാമ്പ്യൻ കൂടിയായ വിശ്വനാഥൻ ആനന്ദിനെക്കൂടാതെ കഴിഞ്ഞ വര്‍ഷത്തെ റണ്ണര്‍ അപ് ആയ സെര്‍ജി കറിയാക്കിൻ, നിലവിലെ ലോക മൂന്നാം നമ്പര്‍ താരം മാമദ്രേറോവ്, ലോക 25-ാം നമ്പര്‍ താരം ഹരികൃഷ്ണ, 44-ാം നമ്പര്‍ താരം വിദിത്ത് ഗുജറാത്തി തുടങ്ങിയവരെയും നിഹാൽ സമനിലയിൽ പിടിച്ചു. എട്ടുകളിയിൽ ആറ് സമനിലയാണ് നിഹാൽ നേടിയത്.

വെള്ളക്കരുവിൽ കളിച്ചതിന്‍റെ ആനുകൂല്യം നിഹാലിനുണ്ടായിരുന്നു. നിഹാലിന്‍റെ മികവ് അറിഞ്ഞു തന്നെയാണ് വിശ്വനാഥൻ ആനന്ദ് കളിച്ചതെന്ന് നിഹാലിന്‍റെ മാനേജരായ പ്രിയദര്‍ശനൻ ബൻജാൻ പറഞ്ഞു.സമനിലയ്ക്കു ശേഷം ഇരുവരും കളി വിശകലനം ചെയ്ത ശേഷമാണ് മടങ്ങിയത്.

തൃശൂര്‍ മുളങ്കുന്നത്തുകാവ് ഗവ. മെഡിക്കൽ കോളേജിലെ അസിസ്റ്റന്‍റ് പ്രൊഫസറായ അയ്യന്തോള്‍ ശ്രുതിയിൽ ഡോ. എ സരിന്‍റെയും സൈക്യാട്രിസ്റ്റായ ഡോ. ഷിജിൻ എ ഉമ്മറിന്‍റെയും മകനാണ് നിഹാൽ. കുറച്ചു നാള്‍ മുൻപ് നിഹാൽ ഗ്രാൻഡ്‍‍മാസ്റ്റര്‍ പദവി സ്വന്തമാക്കിയിരുന്നു. ഇന്ത്യയുടെ അൻപത്തിമൂന്നാമത് ഗ്രാൻഡ്‍‍മാസ്റ്ററായ നിഹാൽ ലോക യൂത്ത് ചെസ് ഒളിംപ്യാഡിൽ സ്വര്‍ണ്ണവുമായി അണ്ടര്‍ 14 ലോക ഒന്നാം നമ്പര്‍ താരമായിരുന്നു.