കുട്ടിന്യോ ഗോളടിച്ചു; ബാര്‍സ കിംഗ്‌സ് കപ്പ് ഫൈനലില്‍

വലന്‍സിയ: ഈ സീസണിലും മിന്നും ഫോമിലുള്ള ബാര്‍സലോണ ആദ്യ കിരീടത്തിനരികെ. 160 ദശലക്ഷം യൂറോയ്ക്ക് കഴിഞ്ഞ മാസം ടീമിലെത്തിയ ബ്രസീലിയന്‍ താരം ഫിലിപ്പ് കുട്ടിന്യോ കന്നി ഗോള്‍ നേടിയപ്പോള്‍ എതിരില്ലാത്ത രണ്ടു ഗോളിന് വലന്‍സിയയെ തകര്‍ത്ത് ബാര്‍സ സ്പാനിഷ് കിങ്‌സ് കപ്പ് (കോപ ദെല്‍ റേ) ഫൈനലിലെത്തി. നേരത്തെ ആദ്യപാദം ഒരു ഗോളിന് ജയിച്ചിരുന്ന വല്‍വെര്‍ദെയുടെ സംഘം 3-0 എന്ന വ്യക്തമായ ജയത്തോടെയാണ് മുന്നേറിയത്. കലാശപ്പോരില്‍ സെവിയ്യയാണ് ബാര്‍സയുടെ എതിരാളികൾ.

ഗോള്‍രഹിതമായ ആദ്യ പകുതിക്കു ശേഷം കളത്തിലെത്തിയ കുട്ടിന്യോ​യാണ് 49-ാം മിനിറ്റിൽ സന്ദര്‍ശകരെ മുന്നിലെത്തിച്ചത്. 82-ാം മിനിറ്റില്‍ ഇവാന്‍ റാകിറ്റിച്ച് രണ്ടാം ഗോളും സ്വന്തമാക്കി. രണ്ടു ഗോളുകള്‍ക്കും വഴിയൊരുക്കി ലൂയിസ് സുവാരസ് തിളങ്ങി. രണ്ടാം പകുതിയില്‍ ആന്ദ്രെ ഗോമസിനെ പിന്‍വലിച്ച് കുട്ടിന്യോയെ കളത്തിലിറക്കിയ കോച്ചിന്റെ നീക്കം ഫലം കണ്ടു. സീസണില്‍ മൂന്നു കിരീടം ലക്ഷ്യമിടുന്ന ബാര്‍സലോണക്ക് കിങ്‌സ് കപ്പ് വിജയം ഏറെ ആത്മവിശ്വാസം പകരും.