പി.ആർ ശ്രീജേഷ് ഇന്ത്യൻ ഹോക്കി ടീമിൽ തിരിച്ചെത്തി

ബംഗലൂരു: മുൻ ക്യാപ്റ്റനും മലയാളി താരവുമായ പി.ആർ ശ്രീജേഷ് ഇന്ത്യൻ ഹോക്കി ടീമിൽ തിരിച്ചെത്തി. കാൽമുട്ടിനേറ്റ പരിക്ക് കാരണം കുറച്ച് കാലമായി വിശ്രമത്തിലായിരുന്നു താരം. ന്യൂസിലൻറിൽ നടക്കാൻ പോവുന്ന ഹോക്കി ടൂർണമെൻറിനുള്ള ഇന്ത്യൻ ടീമിലാണ് ശ്രീജേഷിനെ ഉൾപ്പെടുത്തിയത്.

കഴിഞ്ഞ വർഷം മേയിൽ സുൽത്താൻ അസ്ലൻ ഷാ ഹോക്കി ടൂർണമെൻറിനിടെയാണ് ശ്രീജേഷിന് പരിക്കേറ്റത്. ഇന്ത്യ, ബെൽജിയം, ജപ്പാൻ, ന്യൂസിലൻറ് എന്നീ ടീമുകളാണ് പങ്കെടുക്കുന്ന ടൂർണമെൻറ് ജനുവരി 17ന് ആരംഭിക്കും.

കോമൺ വെൽത്ത് ഗെയിംസ്, ഏഷ്യൻ ഗെയിംസ്, ഹോക്കി ലോകകപ്പ് എന്നിങ്ങനെയുള്ള വൻ പരമ്പരകൾ ഉള്ള വർഷമാണ് 2018. ഇന്ത്യയുടെ ഈ വർഷത്തെ ആദ്യ ടൂർണമെൻറാണ് ന്യൂസിലൻറിൽ നടക്കാൻ പോവുന്നത്.