ലോക ബാഡ്മിന്‍റണ്‍ ടൂര്‍ ഫൈനല്‍സ്: സിന്ധു ഫൈനലില്‍

ഗ്യാംങ്ചു: ലോക ബാഡ്മിന്‍റണ്‍ ടൂര്‍ ഫൈനല്‍സില്‍ ഇന്ത്യയുടെ പിവി സിന്ധു ഫൈനലില്‍ കടന്നു. സെമിഫൈനലില്‍ തായ്‍ലന്‍റ് താരം റജാനോക് കിന്‍റാനോനെയാണ് സിന്ധു പരാജയപ്പെടുത്തിയത്. നേരിട്ടുള്ള സെറ്റുകള്‍ക്കായിരുന്നു സിന്ധുവിന്‍റെ ജയം. കേവലം 54 മിനുട്ടുകള്‍ കൊണ്ട് മാത്രം സിന്ധു ജയം സ്വന്തമാക്കിയത്. സ്കോര്‍: 21-16, 25-23.

ഗ്രൂപ്പ് ഘട്ടത്തിലെ മൂന്ന് മത്സരവും ജയിച്ചാണ് സിന്ധു സെമിഫൈനല്‍ റൗണ്ടില്‍ പ്രവേശിച്ചത്. ഇതോടെ സിന്ധുവും റജാനോകും തമ്മില്‍ നടന്ന എട്ട് മത്സരത്തില്‍ നാല് ജയങ്ങള്‍ വീതമാണ് ഇരുവരുടെയും സമ്പാദ്യം. ചൈനയിലെ ഗ്യാംങ്ചുവിലാണ് മത്സരങ്ങള്‍ നടന്നത്. ഫൈനലില്‍ ജപ്പാന്‍ താരം നൊസോമി ഒകുഹാരയാണ് സിന്ധുവിന്‍റെ എതിരാളി.