ടെന്നീസ് താരം റോജര്‍ ഫെഡറര്‍ക്ക് പുതിയ റെക്കോഡ്

റോട്ടര്‍ഡാം: സ്വിസ് ടെന്നീസ് താരം റോജര്‍ ഫെഡറര്‍ക്ക് മറ്റൊരു റെക്കോഡ്. റാങ്കിങ്ങില്‍ ഒന്നാമത് എത്തുന്ന ഏറ്റവും പ്രായംകൂടിയ ടെന്നീസ് കളിക്കാരന്‍ എന്നതാണ് റോ‍ജര്‍ കുറിച്ച പുതിയ റെക്കോഡ്. 36 വയസുകാരനായ ഫെഡറര്‍ മറികടന്നത് മുന്‍ അമേരിക്കന്‍താരം ആന്ദ്രെ അഗാസിയുടെ റെക്കോഡാണ്.

കഴിഞ്ഞ അഞ്ച് വര്‍ഷത്തിനിടെ ആദ്യമായാണ് ഫെഡറര്‍ ലോക ഒന്നാം നമ്പര്‍ സ്ഥാനം നേടുന്നത്. ഇടയ്ക്കുണ്ടായ തിരിച്ചടികളില്‍ നിന്ന് ഫോം വീണ്ടെടടുത്ത ഫെഡറര്‍ ഈ സീസണില്‍ മൂന്നു ഗ്രാന്‍സ്ലാമുകള്‍ നേടുകയും ചെയ്‍തു.

ഡച്ച് താരം റോബിന്‍ ഹാസിനെ എബിഎന്‍ ആമ്രോ ലോക ടൂര്‍ണമെന്‍റിന്‍റെ ക്വാര്‍ട്ടറില്ർ കീഴടക്കിയപ്പോഴാണ് റോജര്‍ ഫെഡറര്‍ വീണ്ടും ഒന്നാം സ്ഥാനത്തെക്ക് ഉയര്‍ന്നത്.

ജനുവരിയില്‍ ഓസ്ട്രേലിയന്‍ ഓപ്പണ്‍ നേടിയ ഫെഡറര്‍, ഓപ്പണ്‍ എറ ടെന്നീസ് ചാമ്പ്യന്‍ഷിപ്പുകളില്‍ 20 കിരീടം നേടുന്ന ആദ്യതാരമെന്ന് റെക്കോഡും കുറിച്ചിരുന്നു. തിങ്കളാഴ്‍ച്ച എടിപി പുറത്തിറക്കുന്ന റാങ്കിങ് പട്ടികയില്‍ ചിരവൈരി, റാഫെല്‍ നദാലിനെ രണ്ടാം സ്ഥാനത്തേക്ക് പിന്തള്ളി ഫെഡറര്‍ ഒന്നാമതെത്തും.

ഓസ്ട്രേലിയന്‍ ഓപ്പണിന് ഇടയ്ക്ക് പരിക്കേറ്റ് പിന്മാറിയ നദാല്‍ പ്രൊഫഷണല്‍ ടെന്നീസിലേക്ക് ഇനിയും മടങ്ങിയെത്തിയിട്ടില്ല.