ഹൃദയം ബ്ലാസ്റ്റേഴ‍്‍സിനൊപ്പം; ഓഹരികൾ വിറ്റുവെന്ന് സച്ചിൻ

ന്യൂഡൽഹി: കേരള ബ്ലാസ്റ്റേഴ‍്‍സിൻെറ ഓഹരികൾ വിറ്റുവെന്ന വാർത്തകൾ സ്ഥിരീകരിച്ച് സച്ചിൻ ടെണ്ടുൽക്കർ. ടീമിൻെറ സഹഉടമയായിരുന്നു സച്ചിൻ. 20 ശതമാനം ഓഹരികളാണ് സച്ചിൻെറ കയ്യിൽ ഉണ്ടായിരുന്നത്. ഇതോടെ അഞ്ചാം സീസൺ ഇന്ത്യൻ സൂപ്പർ ലീഗിൽ മഞ്ഞപ്പടക്കൊപ്പം സച്ചിൻ ഉണ്ടാവില്ലെന്ന് ഉറപ്പായി.

പ്രമുഖ സ്പോർട്സ് പോർട്ടലായ ഗോൾ.കോമാണ് സച്ചിൻെറ പ്രതികണം പുറത്ത് വിട്ടത്. ഇപ്പോഴും ഹൃദയം ബ്ലാസ്റ്റേഴ‍്‍സിനൊപ്പമാണ്. എക്കാലത്തും ഓർമ്മിക്കാനുള്ള മനോഹരമായ നിമിഷങ്ങളാണ് ബ്ലാസ്റ്റേഴ‍്‍സ് കാലം സമ്മാനിച്ചത്. കളിക്കാർക്കും ആരാധകർക്കും തൻെറ സാന്നിധ്യം പ്രചോദനമായിരുന്നതിൽ സന്തോഷമുണ്ടെന്നും സച്ചിൻ പറഞ്ഞു.

2014ൽ കേരള ബ്ലാസ്റ്റേഴ‍‍്‍സിൻെറ തുടക്കം മുതൽ സച്ചിൻ ക്ലബ്ബിനൊപ്പമുണ്ട്. സച്ചിനോടുള്ള ആരാധന കാരണം ക്ലബ്ബിൻെറ ആരാധകരായവരും ഏറെയാണ്. ഹൈദരാബാദ് വ്യവസായി പ്രസാദ് വി. പോട്ട്‍ലുരിയും സച്ചിനും ചേര്‍ന്നാണ് ടീം വാങ്ങിയത്. തുടക്കത്തിൽ സച്ചിന് 40 ശതമാനം ഓഹരികൾ ഉണ്ടായിരുന്നു. എന്നാൽ പിന്നീട് 20 ശതമാനം ആയി കുറഞ്ഞു.