ഇംഗ്ലണ്ടിനെ തോല്‍പ്പിച്ച് സ്‌പെയ്ന്‍; സലാഹിൻെറ മികവിൽ ഈജിപ്ത്

വെംബ്ലി: യുവേഫ നാഷണ്‍സ് ലീഗില്‍ ആദ്യ മത്സരത്തിൽ ഇംഗ്ലണ്ടിനെതിരെ സ്പെയിനിന് വിജയം. ഒരു ഗോളിന് പിറകിൽ നിന്ന ശേഷമാണ് സ്പെയിൻ വിജയം നേടിയത്. റാഷ്‌ഫോര്‍ഡിലൂടെ 11ാം മിനിറ്റിൽ ഇംഗ്ലണ്ടാണ് മുന്നിലെത്തിയത്. എന്നാൽ 13ാം മിനിറ്റിൽ തന്നെ സ്പെയിൻ സമനില പിടിച്ചു.

റോഡ്രിഗീയുടെ പാസ്സിലൂടെ സോൾ ആണ് ഗോൾ നേടിയത്. 32-ാം മിനിറ്റില്‍ റോഡിഗ്രീ നേടിയ ഗോളിലൂടെ സ്പെയിൻ പിന്നീട് ലീഡ് പിടിക്കുകയും വിജയം നേടുകയും ചെയ്തു. 2-1നാണ് ലോകകപ്പ് നാലാം സ്ഥാനക്കാരായ ഇംഗ്ലണ്ടിൻെറ പരാജയം.

മറ്റൊരു മത്സരത്തിൽ ആഫ്രിക്കന്‍ നാഷണ്‍സ് കപ്പ് യോഗ്യതാ റൗണ്ടില്‍ സൂപ്പർതാരം മുഹമ്മദ് സലാഹിൻെറ മികവിൽ ഈജിപ്തിന് തകർപ്പൻ വിജയം. എതിരില്ലാത്ത ആറു ഗോളിനാണ് ഈജിപ്ത് നൈജറിനെ പരാജയപ്പെടുത്തിയത്. സലാഹ് രണ്ട് ഗോളുകൾ നേടി.